I ha mis au-jährleche Mitarbeiter-Gespräch gha. Es isch guet gloffe u dr’Chrigu isch sehr zfriede mit mire Büetz – das git es guets Gfüeuh.
Ds’einzig Negativ isch, dass ig mi verbrennt ha wüu ig d’Sunne ungerschetzt ha. Itz muessi mit grötete Arme umeloufe 🙁
Hüt hani mi du doch mau hingers Fingernegu schnide bir Sandra dra häre gwagt. Es isch viu eifacher gsy ausi ha dänkt, i wierdes aber o es angers Mau wider denn mache, we si am pfuuse isch.
Mir hei chli mit em neue elektrische Zahnbürstli umegspiut und d’Bohne het’s chum wöue zrügg gä.
Säuber gmachti Burger si haut eifach scho die beschte Burger :€
D’Manu het e Mikroweue gchouft und hei üs abem Handbuech sehr guet möge amüsiere. Nebst de übleche Verdächtige (kes Tier ir Mikroweue z’tröchne) het üs vorauem o erstunt, dasses VERBOTE isch Kochbüecher im Garruum z’platziere (ds’Handbuech aber genau dert isch platziert worde :)).
Es steit o drinne, dass me d’Mikroweue nume unger Ufsicht darf benutze weme Alkohol oder Medikament gno het. Fingi o nid so schlecht – vorauem itz bi üs düre Summer mitem GrillBiere.