Nachdem mir daheime chli sy häregläge, hei mir üs a ds’Uspacke vo dene viele tolle Gschenk und Glückwunsch-Charte gmacht. Viele Dank euch aune!
Unger au dene Gschenk het’s zwo Kreatione vo bsungers Bastuwüetige:
Ds’Wetter het am Morge leider nid so mitgmacht drum het sech die schöni Ussicht hingerem Näbu chönne verstecke. Es isch trotzdem schön u speziell gsi ufem Güsche z’übernachte.
Mir bedanke üs härzlech bi au dene wo sech d’Müeh gmacht hei Öppis uf d’Bei z’steue oder vor z’trage.
Üse härzlech Dank geit a:
- ds’Gabi für z’organisiere, Asprechsperson sy vor dr’Hochzyt und Tätschmeistere während
- ihre Maa, em Mike, für sis Engagement aus Zeremonie-Meischter
- Beatrice, Joëlle, Mano, Mänu und Simon für die steti musikalische Ungermalig vo dem einmalige Tag
- Willi und Barbara für ihri Idee, dass mir es Jahr lang jedi Wuche e Charte (vo üsne Gäscht) überchöme, wo üs a de Tag söu erinnere
- Beatrice und Geru füre Helikopter-Flug über d’Stadt Bern
- Reby und Lüku wo üs hei zwunge ( :)) vor Publikum z’singe
- Götti Peter für d’Ehe-Cherze und dr drhinger steckende Symbolik
- Marianne und Brösi für ds’Video mit Photos vo üsne Chindertage bis id Gägewart
- aune Gäscht wo im Vorfäud e Site gstautet hei für üses einmalige Hochzyts-Buech
Wer am Fescht ke Glägeheit het gha e Blick i das Buech z’werfe isch härzlech iglade üs z’bsueche und e chli Kafi und Chueche z’gniesse (dir dörft natürlech o cho wenn dir ds’Buech scho kennet :))