Nachdem üser Bachofe-Händsche bim Tatarehuet chürzlech massiv hei Schade gno (isch echt Abetür-Esse gsy :)), hei mir Ersatz gchouft wo mi schwer begeisteret!
Jaja, i weiss, es sy nume Bachofe-Händsche… Aber die Dinger sy echt geil.
I ha grad es heisses Blech usem Ofe gno u eifach nix gmerkt vor Hitz. Zuesätzlech wäre sie u easy zum putze da sy usse grossteils us Silikon sy. Wobi sowieso chum öppis dranne bliebt chlebe wo mä müesst putze…
Ja, i bi echt begeisteret wenni sövu ma schrybe drüber 🙂
U Botz ma das plötzlech schneie. Mir sy nume angerhaub Stung z’Bsuech gsy bi Moors u scho isch dr’Chare wiis gsy… D’Heifahrt isch du spannend worde bi so verschneite Strasseverhäutnis, aber dank 4×4 hei mir nie banget.
Und ja, mi het’s hie und da furchtbar gjuckt chli umeztuble mitem Chare (Füdle la usbreche u so).
Aber solang i nid allei dinne hocke, chunnt so Öppis nid i Frag.
Ds’schönschte Wiehnachtsgschenk chunnt vor Sandra a d’Manu – lang het d’Manu müesse warte, itz aber wird sie Mami gnennt vor Bohne, öppis wo sie scho so druf planget het.
Nachem Fescht-Marathon vo de letschte Tage, heiirs nid chönne la sy u hei hüt no Ueli u Monika bi üs iglade zum Raclette mit Tischgrill.
We d’Wohnig scho schmeckt vom Tatarehuet, de müesse mir die Glegeheit doch nutze 🙂
Ds’Götti Andrea u Familie hei üs zum wiehnächtele bi ihne in Chnoflige iglade. Das isch es echts Generationtreffe vo Angerhaub bis 85.
Mir hei dieses Jahr o z’erschte Mau gwichtelet i dere Rundi. Vo üs us gseh e voue Erfoug, überchome doch die Erwachsene so o chli öppis 🙂