Mir sy für ne usziehbare Houztisch ga luege und hei grad Glück gha, dass dr’Interio 20% ufene Artiku nach Wahl git :) Uf die passende Stüeu müesse mir leider no mehreri Wuche warte…
Hüt isch üse eiget Valentinstag, u so ha ig d’Manu miteme schöne Bluemestruus überrascht. Anhand vo irer Reaktion het sie nid mit dem grechnet und so ha ig e schöni Freud chönne mache.
Nach „nume“ 3 Jahr hei mir vom SCB Sekretariat itz ds’Agebot für 2 Saison-Abi übercho. D’Plätz sy sowou nach und uf dr’richtige Site vom Iisfeud – so dass mir dr’SCB 2 Drittu lang vo nachem gseh Goal schiesse :)
Mir hei üs wieder mit üsere Spiu-Gruppe troffe und 3 verschiedeni Spiu chönne spiele, eis Spiu sogar 4 mau. I ha grad e recht guete Abe verwütscht u 2 mau dr’erscht Platz erreicht :)
Wenn ig aber so uf d’Statistike luege, de füehrt i üsere Gruppe ke Weg ar Manu verbi. Aus i auem bringt sie die konstantischte u beschte Resultat.
Und i bi froh e Gegespielere z’ha wo mi immer wieder forderet und d’Messlatte vorgit.
❤️ Härztön
D‘ Sandra und ig sy hüt bim Frouenarzt gsy. Mir hei d Härztön vo ihrem chline Gschwüsterti chönne lose. Diä vor Sandra hei mer du ono glost und d Sandra het no chly mitem Grätli dörfe umespile – was me ihre natürlech nid zwöi mau het müesse säge 😉
Am Bebe geits guet, diä gmässne Wärte sy aui irornig. Dr Doc het gmeint, s Büchli sig scho gross für die 17t Wuche, aber das isch bir nid-erschte Schwangerschaft nüt ussergwöhnlechs.
I ha mi mit Reby u Lüku troffe zum gmeinsam es bitzeli z’Spiele, u Lüku het si chürzlech agfangni Louf uf 7 Siege am Stück chönne usboue.
Sandra het ihre 2. Geburtstag bi schönem Wetter chönne fyre und sichtbar Spass gha derbi. Viele Dank aune wo ihre gratuliert hei oder grad säuber si verbi cho.
Und no es Video vo de erschte Momente vor Sandra und ihrer Spiuzüg-Chuchi:
Bereits ei Tag vorem Geburtstag sy ds’Gotti Andrea, Mischu, Urs und Sara verbi cho zum mit dr’Sandra ihre Geburtstags z’fyre.
Mir hei üs scho ume mit üsere Brettspiu-Gruppe „Brot und Spiele ;)“ troffe und es 40-jährigs Spiu usprobiert – e voue Erfoug, kes Wunder gits es scho so lang :)
Ds’Spiu heist Cosmic Encounter.
Jede Spieler isch e zuefälligi Alien-Rasse und muess probiere im Verlouf vom Spiu 5 fremdi Planete z’kolonisiere.
D’Regle zum Spiu sy recht simpu; ds’würklech Spezieue isch, dass jedi Alien-Rasse d’Regle vom Spiu irgendwie veränderet oder gar komplett bricht. Es macht echt Spass we mä irgend e Regle zum eigete Vorteil darf breche u aui Angere am Tisch es bitzeli niidisch sy (glichzytig isch mä o chli niidisch uf ds’coole Züg wo die Angere hei und chöi mache).
Und bi 50 verschiedene Rasse im Spiu isch d’Chance minim, dass mä 2 mau die glichi Konstellation vo Sonderregle het.