Und es isch offiziell, dr’SCB isch Qualisieger 2016/2017 (angers aus letscht Jahr :)) u itz duuret’s numeno e Wuche bis Play-Offs losgö. Hach, wie ig mi freue!
I ha hüt z’erschte Mau chönne derbi sy we d’Laura komplett alleini louft – sie isch uf mi zuegloffe, guet e Meter, u het sech när i miner Scheiche la gheie.
D’Girls und ig sy hüt mit em Grosi ds Heimberg id Badi. D’Marianne u d’Sandra gö aube is Chinderschwümme und da grad Sportwuche isch, sy mer jetz mau aui zäme gange. Es het für aui u gfägt, o d’Laura isch grad sofort begeischteret gsy u när sy mer aui ordnentlech gschafft gsy. Isch e super Idee gsy vo der Marianne und genauso ä super-Tag 😀
Mir sy hüt Nami bi mine Eutere verbii (Bommi und Ätti) u hei mit ihne das wunderbare Wätter bimne Waldspatziergang gnosse. D’Sandra het dörfe s Velöli mitnäh u het o der Plousch gha. Zum z’Nacht hei mer no gmeinsam es feins Raclette g’ässe.
Herrlech! Das wunderbare Wätter het o üs wieder useglockt. Mir heis gnosse wie verruckt u zum zNacht het Pädu ume eis der Grill aglaa :)
D’Sandra freut sech scho der ganz Morge, dass mir zwöi üses Baschtuprojekt ,Fisch‘ abgschlosse hei.
Im MuKi-Turne hets äbe sones Fischli-Spieu u das fingt d’Sandra ungloublech toll.
Vor öppe 10 Täg hei mer d’Materialie gkouft u hei losgleit. Zwöi mau gkleischteret, Magnet ufchläbe, mit Akrylfarbe agfärbt u no miteme Glitzerstift drüber. Jetz sy d’Anguruete no nid ganz fertig, aber gnue fertig für dass si cha usteschte wies geit.
Es het gfägt mit der Sandra di Sach ds Baschtle. D’Sandra muess eifach no lehre, dass baschtle/male ohni Finger dräckig ds mache fasch nid geit 😉
D’Sandra het hüt mau wider chly dörfe Prinzässin spiele.. sie liebts sech chönne ds Verchleide.
I ha dieser Tage es luschtigs Comedy „Werbe“-Video gfunge wo sech a Trump richtet und ihm vorschlat nach „America First“ söu er doch „Switzerland Second“ e Chance gä.
Lauras erschti Schritte
Hüt am Abe vorem is Bett gah, het d’Laura ihri erschte freie Schritte güebt. Nid vieu – drü am Stück – u ungloublech tapfer het si das gmacht… 🙂