Vorstelligsgspräch :)
I ha hüt (am Tag vor üsne Ferie!) no es Vorstelligsgspräch gha. Bi der Firma Stauffer Metallbau AG. Bi mau gspannt öbs ä Fortsetzig git…
Nachdäm d’Laura und ig d’Sandra bir Spieugruppe abholt hei, hets ä Überraschig gäh für di Chline.
Mir sy zäme ir Beckerei am Bhf Heimberg go beleiti Brötli u ds Trinke choufe und wo d’Sandra het gseh, wo mir wei ds Mittag ässe, het ihres ganze Gsicht gstrahlet 🙂
Mir hei ufem Spieuplatz bim Bahnhof Heimberg picknicket u nachem ässe hei sech di zwöi es Stündli dörfe ustobe. Das isch cheibe guet acho bi de Meitschis.
I ha g’üebt Zöpfle füre Mittuautermärit s Kiesen. D’Laura het erstuunlech guet häregha.
Schnaaarch…
D’Sandra het usnahmswiis d’Mittagsrueh/Pfüsu dörfe i der Stube mache. Mir hei üs ds Sofa teilt. U es schint aus wär si rächt müed gsy… 
Endlech geit d’Hockey-Saison wieder los, u de grad miteme Match ir Champions Hockey League. Ds erschte Heimspiu isch gäge englisch Club Nottingham Panthers, wo mir mit 5:2 hei chönne gwinne.
Juhuuu, fertig mit Chinderchleidli…
Nachdäm ig bereits vor ere Wuche s Chleidli für d Laura füre Mittelaltermärit ha fertiggstellt, hani du doch no öppis für d‘ Sandra afa schnurpfe. Hüt isches fertig worde – und ig bi zfridener aus ig hätt dänkt. Isch würklech hübsch worde 🙂 laat sech durchus la gseh.
S Chleidli vo der Laura
Auso ehrlech, dass schafft me o nur unabsichtlech…
Das Kunstück het d‘ Laura gschafft – bi mäng angerem wär dä Bächer grad wider abegheit 🙂
D’Laura het d’Zyt o chönne gniesse, während d’Sandra ir Spieugruppe isch gsy. Mir hei di ganz Zyt ufem grosse Spieuplatz am Bhf Heimberg verbracht.
D’Sandra het hüt es neus Kapitu ufgschlage. Der erscht Spieugruppe-Tag. Es het ihre wahnsinnig gfaue u si freut sech scho u fescht uf nächst Dsischtig :)
