Hüt symer id 13h Vorstellig vo Sherlock Gnomes. Es isch super gsy, mir hei der ganz Chino-Saal für üs allei gha 😁
Popcorn u Glace hei natürlech o nid dörfe fähle.
U womer wider hei sy cho, isch immer no vieu Zyt übrig gsy zum Wätter gniesse u bädle.
Mir hei o dises Jahr wider mit der Dameriege amne Turnfescht teilgnoh. Dismau symer im Seeland gsy. S Buchsi heimer tatsächlech der zwöit Platz ghout (vo sibä). Mir sy säuber bau chly überrascht gsy.
Nächst Jahr findet s Aarau ds Eidgenössische statt. I fröie mi scho jetz druf, das wierd sicher ä riese Sach 😁
Da Pädu diverses het wöue neu gstaute uf üsere Terrasse, hani mi bereit erklärt, der alt Sandchaschte dänn z tue.
I ha ä super auternative gfunge, wo erstuunlech guet bi de Kids achunnt. U sy hei ersch no meh Platz drumum… haut chly ufwändiger ds verrume, aber brucht wenigstens nud so vieu Platz bim verrume.
I ha durchus rächt müesse lache woni das hüt Abe mau entdeckt ha :))
D’Sandra hets hüt Morge no eis i der Spieugruppe gnosse. I gloub hüt hets ihre sehr gfaue, wöu si hei Rouespieli gmacht. Wo mir Eutere d’Chind sy go abhole, hei mer ä kompletti Chrippe mit Maria, Josef, Hirte, Ängle u Chünige dörfe bestuune 🙂 u d’Sandra isch äbe eine vo de Chünige gsy
Am Nami isch de s’Grosi d’Sandra cho abhole. D’Sandra darf (sofern si solang möcht – luege mer de wies mitem Heiweh isch) bis am 24.12. bi Grosi u Grösi blibe. Durchus o chly Ferie für mi :))
D’Laura wierd se gwüss vermisse – dennoch het si mit vieu Fröid grad schnäu aui Spieusache vo der Sandra i Beschlag gno u hets hüt nachem ds Nacht gnosse, mau di ganz Badwanne für sich ds ha :=}
Dise Mändig hei mer s letscht Mau Turne gha i disem Jahr. Mir hei der ganz Abe nur Bauspieli (übers Seili) 4 gäg 4 gmacht. Isch ä gmüetlechi Art gsy, s’Turnjahr ds beände.
Da Pädu am Mändig Morge s ZH ä bruefleche Termin het müesse warnäh (am Morge am sibni), hani der Sandra ändlech erloubt, dass si mau wider i üsem Bett darf pfuuse. Wies so louft, het sech haut o d’Laura nid mit ihrem eigete Bett oder em Reisebettli wöue la abspise..
Am Schluss hani beidi bi mir gha – d’Sandra het 1/2 vom Bett brucht u di angeri heufti isch öppe 60/40 zu gunste Laura ufteut worde.
I ha am Morge s Gfüeu gha, u sig chly übernächtigt – dennoch, irgendwie isches o schön gsy, d Sandra mau wider so nach ds ha und mit der Laura (Heizöfeli) ächly ds Kuschle 🙂
Mir hei hüt üses erschte Wiehnachtsfescht dörfe fyre. Marianne und Brösi hei uf Schenkon iglade, wo mir scho sit eme Jahrzähnt jedes Jahr am Samschtig vorem 24.12. üses zämefwürflete Wiehnachte dörfe fyre. Si hei sich mau wider rächt is Züg gleit und üs aui verwöhnt. – i bi nur chly nervös worde, we d’Laura ds nach zum Boum isch 😉
Mir hei üs dises Jahr s erschte Mau fürnes Adventsfenster igschribe. Ds 12i isches du worde.
Pädu und ig hei üs du rächt is Züg gleit und ig bi begeisteret, wi guet dases isch worde.
