-
I ha für d’Sandra hinech mau es chly angers Vorabeprogramm gha. Mir hei gmeinsam paar Eier bemaut. Ds Resultat laat sech durchus la zeige.
-
Bis jetzt klappts wunderbar mit Laura’s neuem Bett. Si het schinbar nid so Problem wach is Bett gleit ds wärde und när allei ischlafe. U wesi de am Morge oder nachem Mittagspfüsu ufwacht, ligt si meischtens eher der quer wäg i ihrem Näschtli.
-
Mir hei hüt ume eis das wunderbare Wätter gnosse. D Sandra freut sech scho jetz, wes de wider warm gnue isch zum richtig chosle. Zur Zyt muess haut s Seifepläterli länge.
-
I bi hüt mit üsne Modis es Fährtli zur Post go mache. O wes chly äng het usgseh hinger drinn, hei sis ömu rächt gnosse 🙂
-
Hie isch no es chli äuters Video vor Sandra wie sie e Bürzliboum macht. Mir hei’s scho länger uf YouTube uecheglade gha, aber irgendwie hets es nid ufe Blog gschafft…
https://www.youtube.com/watch?v=bkojYr-1bYg
-
Hüt wo d’Sandra und ig üs für ds Vieri häregsetzt hei, het üs d’Laura rächt überrascht. Plötzlech isch sie ufem Buuch gläge… Het sech s erschte mau säuber dräit 🙂
-
D’Sandra isch bim Zahnarzt gsy u het Lob erhaute für wie guet ihri Zähn sy. Das freut u macht ds’Zähn putze irgendwie o eifacher.
-
Dr TV Heimberg het die grossi Turn-Uffüehrig gha und ds’MuKi-Turne het die ganzi Show eröffnet. D’Sandra het viu Freud gha a ihrem Uftritt o wenn sie aus Nest-Häkchen no nid aui Figure mitgmacht het.
https://www.youtube.com/watch?v=32ff0zCQ_TM D’YouTube Video-Stabilisierig het mir hie echt dr’Arsch grettet. I ha d’Kamera drum nume mit eire Hang chönne häbe, wüui ufem angere Arm d’Laura treit ha (mä ghört se ca bi 1:22 :))
-
Hüt isch d’Houptprob vom Heimberger Turnverein gsy und so sy o Sandra u Manu mit dr’MuKi-Turne-Gruppe ga üebe. Laura u ig hei se grad begleitet wüu mir hei wöue luege was die da mache.
I ha es erschts Video gmacht, muesses aber no sichte. Eventuell muessi no es Zwoits mache während dr’Uffüehrig säuber – die isch am Samschti, 12. März.
-
Sit wenige Tage faht d’Sandra afa bhoupte „Mami/Päpu het gseit i darf“. Sie muess aber no chli dranne schaffe u besser luege, dass die gnennti Person nid grad näbe dranne steit 🙂