-
BBQ Endi November
Mir sy scho chli irri Schaf. Mi Nachbar Köbu und ig hei üs bereit erklärt amne witere Nachbar bim Zügle z’höufe und d’Mannschaft z’verpflege. Zu däm Zweck hei mir churz nach Mitternacht agfange 5 Kilo Fleisch zu Pulled Pork, und witeri 2.5 Kilo zu Pulled Beef z’grille.
-
Mir isch wieder mau chli nach grille gsy – so hani mi wieder mau a Pulled Pork gwagt. Zur Gschmacks-Intensivierig hani de 2.2 kg Schwynshaus am Vorabe no mitere Mariniersprütze bepumpt u aschliessend mariniert.
Dr’Bitz hani de am 7:30 am Morge ufe Grill gleit u dr’ganz Tag la schmorre. Das isch ds’pullte Pork nach dr erschte Rundi (4 erwachseni Esser): Und so het me Pulled Pork-Dürüm/-Fajita usgseh:
-
Gotte Ste (Sandras Gotte m) u dr’Jerry sy üs cho bsueche und hei sech la überzüge vo mine Fähigkeite us Schweine-Rippchen lecker Znacht zuez’bereite 🙂
-
Aus erschti Versuechskaninchen hei Reby+Lüku müesse härehaute und knauhert Red u Antwort sta bezüglech em Verzehr vo mine 4-Stunde SpareRibs. Drufabe hei mir dr’Abe miteme gmüetlech Brettspiu la usklinge (drum heisst üsi Brettspiu-Gruppe o „Brot und Spiele“). Ah, und d’Manu het öppe dr’bescht Härdöpfu-Salat gmacht wos je hets gits!
Für aui die wo itz glustig sy und o möchte tafle, häbet Geduld. Leider isch dr’Grill z’chli zum meh aus 3 kg SpareRibs z’mache u drum chöi mir euch nid aui glichzytig ilade. Aber dr’Summer isch no länge, da wird sech ja sicher öppis ergä.
-
Dank dr’neue Grillplatte chani mis Grill-Repetoire erwitere – mis hütige (glungnige) Experiment isch Spiegu-Eier mit Speck. Grille zum Zmorge chönnti mi echt dra gwane.
-
Chürzlech hani verzeut dass ig mau wott BBQ SpareRibs versueche z’smoke ufe Grill. I ha dermit grad e Tschuppele Lüt glustig gmacht u ha drum itz mau e Probelouf gmacht (wo wahrschinlech nume no glustiger macht).
-
Dr’John u d’Sandra, sini Partnerin, sy ufe Mittag zu üs cho zum gmeinsame Grille, chli Sy und Laffere. Mit so gmüetleche Sunntige laht sech d’Wuche guet la usklinge.
-
Dr’neu Grill het e Spiess mit Elektro-Motor mitglieferet gha u so hei mir hüt es Güggeli ufem Grill gmacht. Es het zwar no Verbesserigspozential, aber mir sy uf guetem Weg.
-
Mir hei füre 1. Ougschte üsi Brot und Spiele Gruppe und no e witere Gascht iglade zum gmeinsam Grille u drufabe chli Fürwärchle. Letzteres isch wegem Wetter recht id’Hose, was mir derfür mitere Ladig Party-Spiu kompensiert hei 🙂
-
Päpu het e neue Grill *freu* – I has bire Aktion nid chönne verchlemme u bi itz stouze Bsitzer vomne dopplet so grosse Grät wo sogar d’Müglechkeit bietet mitere Rotisserie Güggeli zue z’bereite.
D’Sandra isch mir übrigens bim zämeboue e schöni Hiuf gsy. Sie het mir immer wieder Werchzüg greicht oder Schrübli ufgläse wo mir blöd us dr’Hang gheit sy (jaja, Informatiker u so :-p).