Vor es paar Tag hani aui Brettspiu usgstoubet und uf Ricardo gsteut. Hüt hei d’Auktion geendet u i bi überrascht wieviu druf bote worde isch :)
Im Verlouf vor Zyt hei sech so es paar Brettspiu agsammlet, so dass mir itz e Usmischtete agfange hei. Aus erschts hei mir bi üs ir Gruppe nachegfragt ob öpper am Öppisem interessiert isch – dr’Rescht wanderet öppe de uf Ricardo oder so.
Es isch nid so dass das schlechti Spiu sy. Im Gägeteil, einzelni vo dene Spiu hei üs Stunde vo Ungerhautig glieferet. Es isch nume so, dass mittlerwiele angeri Spiu meh i üser Gunst (und de usgmischtete ir Sunne :)) stöh.
Nachdem i geschter ir Romandie bi ga ds’ersteigerete Chinderbett abhole, hani hüt aues chönne zämesetze u dr’Sandra so e riesigi Freud mache.
Während em Zueluege het sie sich immer wieder bedankt und het’s chum möge erwarte bis ändlech aues isch zäme boue gsy und sie het chönne ufechlättere.
Diese Abe sy miner Ricardo-Auktione für PlayStation3, Games und Lenkrad fertig worde und totau isch meh zäme cho aus ig im Vorfeud erhofft ha. So gfaut’s – meh Batzeli u meh Platz :)
Ds’Bond-TrippTrapp isch cho und d’Sandra u ig hei drufabe meh aus e haub Stung lang üse Spass gha und mit dr’Karton-Chischte umeglölet. Es macht Freud wieder chli Ching z’sy.
Mir hei uf Ricardo es TrippTrapp für d’Laura ersteigeret, es ganz es Spezieus wie sech het usegsteut – ersteigeret vo Sir Roger Moores Schwiegertochter, sy sicher Bond-Enkuching druffe ghocket.
Ds’Päckli mit de Brettspiu woni dieser Tage füre Lüku ersteigeret, isch itroffe und es isch doch es recht grosses Päckli worde :) Lüku wird sech freue.
Nachdem mir die Wuche erfougrich üsi Garte-Lounge versteigeret hei, hei mir üs de o grad öppis Neus für d’Terrasse ersteigeret: e Holztisch inklusiv 6 Hochlehner-Stüeu.
Die Angeri wo i de letschte Minute mitbote het, het mi recht möge ärgere. Vorauem wüu sie nid kapiert het wie Ricardo funktioniert.
Sie het nadisna im Mindest-Erhöhigs-Schritt bote und bote und bote und bote… Sie allei het öppe 100 Gebot abgä und isch geng outomatisch überbote worde wüu üses Limit höcher isch gsy.
Sie het sich o viu Zyt gpsart hätt sie eifach o ihres Limit itreit und gluegt ob sie drüber mag oder nid.