-
So schön, hüt Morge het mir d’Waag numeno 82.5 kg azeigt.
-
Dä ganz Sport vo de letschte Monet het sech würklech glohnt. Mir het d’Waag hüt zersch mau syt Jahre wieder unger 83kg azeigt.
-
D’Sandra isch zum erschte Mau live amene SCB-Match derbi gsy und het sehr möge rüehme wie toll dass es sig und wie guet es ihre het gfaue.
Mir hei üs extra es Spiu vor Champions Hockey League usgsuecht wüu die erfahrigsgemäss weniger Zueschouer hei. Auerdings sy mir de glich scho nachem erschte Drittu wieder hei wüu’s sehr chaut isch gsy und d’Sandra de doch het afa unruiger werde.
-
So, Manu u ig hei i de letschte 3 Monet üses Trainingsprogramm sehr guet dürezoge u si totau uf je öppe 40 Trainings-Tage cho mit Schwitze, Chüüche, Flueche u Muskukater. Aber es het sech glohnt u mir werde wyterhin dran bliebe.
-
D’Sandra het am 32. Heimberger Giele- u Meitlilouf mitgmacht, ir Kategorie Bambini het sie so 300 Meter müesse seckle.
Bi de Chlinschte het jewius e Eltere-Teil dörfe mitseckle.
-
Dr TV Heimberg het die grossi Turn-Uffüehrig gha und ds’MuKi-Turne het die ganzi Show eröffnet. D’Sandra het viu Freud gha a ihrem Uftritt o wenn sie aus Nest-Häkchen no nid aui Figure mitgmacht het.
https://www.youtube.com/watch?v=32ff0zCQ_TM D’YouTube Video-Stabilisierig het mir hie echt dr’Arsch grettet. I ha d’Kamera drum nume mit eire Hang chönne häbe, wüui ufem angere Arm d’Laura treit ha (mä ghört se ca bi 1:22 :))
-
Hüt isch d’Houptprob vom Heimberger Turnverein gsy und so sy o Sandra u Manu mit dr’MuKi-Turne-Gruppe ga üebe. Laura u ig hei se grad begleitet wüu mir hei wöue luege was die da mache.
I ha es erschts Video gmacht, muesses aber no sichte. Eventuell muessi no es Zwoits mache während dr’Uffüehrig säuber – die isch am Samschti, 12. März.
-
Ds lange Plane vo Lükus Pouterabe het sech glohnt. Er gseht cheibe fesch us i syre Football-Usrüstig und er isch o üsserscht erfougrich bim Verchouf vo Züg zum sech sis Znacht z’verdiene. Bim Lasertag spiele sy mir de aber doch aui ordentlech i ds’Schwitze cho und hei chönne im Bitz umeballere wie die Hohle (o wenn nid aui glich guet treffe :))
-
Botz hani banget, gfluechet u gfutteret mit üsne Mutze. Aber schlussendlech hei sie dr’Haubfinau-Iizug doch gschafft. Sie schyne ds’Messer am Hals irgendwie z’bruche…
-
So flott, dr’SCB het dr’Cup-Halbfinau gäge ZSC i letschter Minute möge gwinne u steit itz im Finau gäge d’Chlote Grounders — e Mannschaft wo nid grad die beschti Saison het dieses Jahr.