-
Hüt het üs d’Sandra grad 2 mau überrascht. Zum einte het sie vo de Cousin sofort erfougrich abgluegt wie mä uf ds’Schouku-Ross stigt und wieder drab chunnt. Aber no überraschender isch gsy wo sie üs ihri Adresse verzeut het ohni das mir öppis hei vorgchüschelet.
-
Chum isch Herbst-Afang hei mir üs es Fondue gnemiget 🙂 Angers aus bim letschte Mau het sech d’Bohne aber nid glich derfür la begeistere. Jänu, das chunnt de sicher no.
-
Üsi gueti Fründin, ds’Reby, het zur Geburtstags-Fyr iglade, was mir üs natürlech nid hei la entga. Happy Birthday Reby, gniesses mitem älter werde solang no ds’2 am Rügge bliebt 🙂
-
Mie hei ume eis e Bsuech bim Frouarzt gmacht u hei e Blick uf Pfupf gworfe. Sie entwicklet sech sehr guet was üs sehr freut. Ah, d’Sandra het bim Ultraschaue dörfe häufe und em Doktor de gar 2-3 mau zviu ufem Computer umedrückt 🙂
-
Usem Nüt use het mi d’Manu miteme ibeizte Rehpfeffer mit Chegele, Rotchrut u Spätzli überrascht. Sie isch zu urecht usicher gsy, ds’Esse isch super fein gsy!
-
Mir sy in Excenevex zure Wuche Glamping (Glamour Camping) acho und hei üses vorinstallierte Wohnmobil chönne i Bezug nä. Das wird sicher e gmüetlechi Wuche.
-
Ds Schueujahr het agfange und dementsprächend o s MuKi-Turne. D’Sandra und ig sy jetz für dises Jahr offizieu agmäudet. Di drü Mönet warte hei grad vieu bracht. Sie het fasch die ganz Stung möge mitspiele und mitseckle. S Thema hüt isch gsy: Mir gö (imaginär) id Badi – ä chlyni Staffete im Sinn vo „i packe mini Badtäsche“ u när hets no e chlyne Poschtelouf gäh, wome mit Matte, Bänkli, Barre etc Wasserrutschine und Sprungbrätt u was mä haut so cha mache ir Badi nachegsteut het. D’Sandra het ei riise Fröid gha (u es het äuä bim umeseckle keni so gschwitzt wie ig).
-
I ha mir mit Manus Hiuf d’Haar gfärbt (oder äbe la färbe), u das nid mau wäge de graue Haar (wovon ig ja eh kener ha :)), sondern wüu ig chürzlech es äuters Foto ha gseh vo mir mit gfärbte Haar.
-
I ha der Sandra vor ere Wuche e Badeponcho bsteut, da s Badmänteli wosi vo Götti Mike het, langsam chly chlii isch worde. Mir heine ömu grad sofort müesse aprobiere 😉
-
Recht spontan hei mir üs entschiede bi däm soso-lala Wetter e Bsuech im Tierpark Dählhölzli z’mache – o chli ir Hoffnig es syg de nid gstungget vou. D’Sandra het viu Tier chönne bestuune u het o no daheime viu vo de gsehne Tier i ihrne Büechli nomau füre gsuecht.