-
Mu-Ki-Turne
I bi hüt mit der Sandra is Mu-Ki-Turne -grad bi üsem Schueuhuus- go ineschnuppere. Öbs öppis isch oder öbs no ds früech isch, chani no nid säge. Sie isch uf jede Fau die Jüngschti gsy. Sie het sech chly schwär taa, we me ruhig het söue warte u zuelose bi dä Erklärige, aber sobaud sie…
-
Die Spiucharte-Schutzhülle wo mir chürzlech gchouft hei sy echt dr’Bringer. D’Charte lö sech viu gäbiger la mische, füehle sech guet a u nutze sech nid ab (spiut o ke Roue we mä chlebrigi oder schüsch dreckigi Finger het :)).
-
Aus Dankeschön für üsi Mithiuf a ihrer Diplomarbeit, het d’Ste, mi Schwoscht, üs aui zumne feine u usgiebige Brunch (irgendwo im Nirgendwo :)) iglade. Merci Ste!
-
Nachwuchs!
I ha hüt ä sehr wichtige Termin gha. Jetz wüsse mir, dass mit üsem Bebe aues OK isch – u ds Gheimnis cha ändlech glüftet wärde. D Sandra überchunnt gäg ändi Jahr es Gschwüsterti. Mir freue üs sehr 🙂
-
I bi wieder es Jahr riifer worde 🙂 Viele härzleche Dank a aui wo a mi denkt hei (per Telefon, SMS oder gar sy verbi cho), i ha dä Tag sehr gnosse!
-
I ha es zytli müesse warte bis mir e Rundi Game of Thrones hei chönne spiele, aber ds’Warte het sech glohnt (für mi). Nachere intensive Erklärig sy mir öppis über 3 Stung dranneghocket und hei zitteret, gfluechet und gspannet zueluegt wie Schlachte um Westeros sy gfochte worde.
Am Schluss isches mir glunge miteme länger plannete Doppuschlag dr’Sieg a mi z’risse – nachdem ds’Reby u d’Manu sech sy id’Haar grate und sech gägesitig dr’Sieg verunmüglechet hei. Einzige Wermuetstropfe isch, dass ig d’Lannisters ha zum Sieg gfüehrt. Das isch öppe die Adels-Familie wo mi ide Büecher (Lied von Eis und Feuer) am meischte ufregt…
-
I ha scho e gueti Frou. Obwou mir ordentlech Znacht gässe hei, hani im Verlouf vom Abe no es Hüngerli entwicklet… U da het sech d’Manu i d’Chuchi begä u mir es leckers Sandwich gmacht 🙂
-
Endlech Wuchenend! So bi ig o mau mit ufe Spiuplatz im Quartier u mir hei mit dr’Sandra gspiut uf was sie so het Luscht gha.
I ha de no chli mit dr’Kamera umegspiut und es zwoits Video gmacht wo chli „kreativer“ isch vom Blickwinku, auerdings nid ganz so agnehm zum luege (bsungers im Voubiud nid…):
-
Hüt hei mir aus Gäscht vo üsem Finanzberater im Berner Hockey-Tempu (o Allmend oder PostFinance-Arena gnennt) chönne ds’dritte Haubfinau-Spiu zwüsche de Mutze und em HC Davos luege.
Ds’Resultat isch leider nid glich zu üsere Zfriedeheit usgfaue. Dr’SCB het zwar guet gspiut, aber leider ke Schiebe i ds’Goal bracht 🙁 So het’s de Bündner glängt mit ihrem einte Treffer (und amne Empty-Netter) o ds’drittu Spiu für sich z’entscheide 🙁
-
D’Manu u d’Sandra sy scho am Nami ds’Schenkon gsy u hei Sandras Grosi (mis Mami) bsuecht. I bi nachem Fyrabe o verbi u mir sy miteme feine Znacht bechochet worde.