Familie Wäger

D’Manu u i hei hüt mit dr’zwoite Season vo Game of Thrones agfange. Diesmau luege mir itz o uf Englisch, was d’Wäut no interessanter u authentischer macht (zB dür d’Dialekte).

Oktober 22, 2012
D’Fondue-Saison isch eröffnet. U de ersch no miteme ganz spezieue Fondue: verusse mitem 3-Bei überem Füür. Herzleche Dank ad’Familie Moor, d’Gastgäber.

Oktober 20, 2012
I ha mir es neus PS3-Game zoge („XCOM: Enemy Unknown“ – rundebasierti Strategie) u bi positiv überrascht wieviu Komplexität u Toifi es bietet.

Oktober 18, 2012
Bi Mike het e chlini Männer- u Bier-Rundi stattgfunge. Mir hei sogar no es Fleisch ufe Grill ta; u das doch eher spät am Abe.

Oktober 17, 2012
I de letschte Arbeitstage bini vom T (Trevor) gfragt worde ihm dr’Rubik-Würfu z’erkläre. Itz geits scho vei guet u dr’T chane fasch ohni Spicker komplett löse.

Oktober 16, 2012
Im Fyrabe-Bier hani mit Mike u John über d’Zuekunft vo 3-egg diskutiert. I ha grad gmischti Gfüeu, aber mit de Jungs Eine ga nä het uf au Fäu gfägt!

Oktober 15, 2012
Mir si vorem erste Tatze-Derby (SCB – SCL) no ir Markthaue ga es 201 (Bakmi Goreng mit Poulet) ässe. Das cha geng ume guet.

Oktober 13, 2012
Eigetlech hätte d’Joelle u dr’Mano wöue cho dr’Match luege. Da sie ersch 10 Sekunde vor Match-Endi si itroffe, hei sie nüm grad viu gseh…

Oktober 12, 2012
Herzleche Glückwunsch, Mano! Di Bachelor isch meh aus verdient, und ds’druf Astosse het viu Freud gmacht.

Oktober 10, 2012
Mi auer-erscht Bsuech bimne Frouearzt. Nachere lange Zyt im Wartruum heimer z’erschte Mau chönne Ultra-Schau luege. I ha aber nid viu erkennt.

Oktober 10, 2012