Familie Wäger

Ds’Bond-TrippTrapp isch cho und d’Sandra u ig hei drufabe meh aus e haub Stung lang üse Spass gha und mit dr’Karton-Chischte umeglölet. Es macht Freud wieder chli Ching z’sy.

November 10, 2015
I ha mi hüt so chli aus Guafför versuecht, mit meh Erfoug aus initiau erhofft. D’Manu het scho gwitzlet i heig „mini Bruefig verfäuht“ 🙂

November 10, 2015
Irgendwie hani hüt es déjà vu gha… Hami durchus i Mai 2013 zrüggversetzt gfüeut.

November 9, 2015
Woni mit dr’Sandra bi ga kömerle het sie unbedingt ufeme schmale Simsli (ca 8cm) wöue balanciere und mi de o grad verblüfft het wüu sie’s gmacht het aus wär sie nie angers gloffe.

November 9, 2015
Nach wenige Tag mit dr’Laura erschynt mir d’Sandra grad mindestens es haubs Jahr älter worde z’sy – sie macht aber o grossi Fortschritte i aune mügleche Bereiche. I bi so stouz uf mi Hüehnerhuufe 🙂

November 7, 2015
So guet, da dr’November so warm isch im Moment, hani doch grad ume eis dr’Grill füregno und agworfe. Das cha viu!

November 7, 2015
Ah, und für aui wo Interesse hei üs cho z’Bsueche, dir syt härzlech wiukomme. Bis am 15. Nov. isch Pädu ebefaus dr’ganz Tag daheime.

November 6, 2015
Mir sy daheime acho und hei üs o grad sofort guet iglebt. D’Sandra isch e Schatz vo grosser Schwoscht und immer sehr hiufsbereit und fürsorglech. Zuesätzlech faht d’Laura meh und meh afa d’Ouge uftue und umezluege. Es isch e wunderschöni Zyt so.

November 5, 2015
Mir hei uf Ricardo es TrippTrapp für d’Laura ersteigeret, es ganz es Spezieus wie sech het usegsteut – ersteigeret vo Sir Roger Moores Schwiegertochter, sy sicher Bond-Enkuching druffe ghocket.

November 4, 2015
D’Sandra isch ihres chline Schwösterli cho bsueche und het d’Laura ganz schnäu i ds’Herz gschlosse.

November 3, 2015