Familie Wäger

Botz hani banget, gfluechet u gfutteret mit üsne Mutze. Aber schlussendlech hei sie dr’Haubfinau-Iizug doch gschafft. Sie schyne ds’Messer am Hals irgendwie z’bruche…

März 14, 2015
Da d’Manu grad nid so het möge, ha ig haut allei es Brettspiu gspiut. Mini Wau isch uf Viticulture gfaue (das wo ig über KickStarter backed ha), da das es usgriefte Einzuspieler-Modus het. Und botz, dä Automa-Bot het mi recht möge ufrege wüu er mir guet dri gfunkt het. Schlussendlech hanis ir letschte Rundi knapp gschafft und ha doch no mit 22 zu 20 gwunne — aber das isch uf dr’eifachste Schwierigkeits-Stufe gsy *hmpf*

März 11, 2015
Mir schynt aus würd d’Sandra dieser Tage jede Tag es neus Wort lehre. Eis vo de neuere, wo mi fasch verputzt isch „Bousi“ — Auerdings heisst das für d’Bohne „Gonfi“, was sech nid ganz deckt mit dem wo ig kenne 🙂

März 10, 2015
D’Website het es neus Gwand — nach zwoiehaub Jahr darf mä gloub guet e chli früsche Wind und früschi Farbe uf d’Site bringe 🙂

März 9, 2015
Während d’Bohne ire Mittagspfüsu gmach het, hani miner erhandlete Spiu chönne uftue, aluege uf kontrolliere. I bi positiv überrascht worde, Eis isch no originauverpackt gsy u imne Angere sy aui Charte i spezieue Schützhüue.

März 7, 2015
U erneut hani mi mit Reby u Lüku troffe. Hüt hei mir üs über ihres Hochzyt ungerhaute wo ig ja Lükus Trouzüge bi. Speter, nachdem mir aues bemurmlet hei, hei mir mis chürzlech erworbene „Escape“ usprobiert.

März 6, 2015
I ha hüt churzerhand d Haarschäri, woni im Dütsche gkouft ha, a der Sandra teschtet. Jetz het sie zwar kes VoKuHiLa (Vorne kurz, hinten lang) meh, drfür gseht sie no chly meh wienes Büebli us 😉

März 6, 2015
Mir sy uf Dütschland ga miner Brettspiu-Päckli abhole u no chli ga lädele. Da hani ds’Spiu „Escape“ ir Aktion entdeckt u zuegschlage – u ha so nume knapp e Viertu soviu zaut wie ir Schwiz 🙂

März 5, 2015
D Sandra isch hüt mit mir zum Zahni id Kontrolle. Da sy ja inzwüsche o paar Zähn het (ca 14 Stk), het o sie ihres Muu ufgrisse und ihri Zähn zeigt. Es het ihre gloub no Spass gmacht, am Reto (dr Zahni) ds zeige, wo sie überau scho Zähn het.

März 3, 2015
Playoffs!!! Die wichtigsti Zyt im Hockey geit los … u i ha mit Fründe zum Znacht u Spiu-Abe abgmacht 🙂

Februar 28, 2015