-
Mir si bsuecht worde vom Reby und em Lüku u hei e glungne Abe mit Grill u Brettspiu dörfe verbringe. U ds’Reby isch e Meister im Goimele 🙂
Und entgege dr’gängige Meinig vor Manu („Pädu gwinnt geng“) het sie üsi recht längi Trivial Pursuit Rundi für sich chönne entscheide.
-
Ir NZZ isch e glungne Artiku abdruckt worde über d’Sprach, schrägi Sprachblüete und wie dr’Feminismus (die Feminismusin?) Sätz zu Bousteue laht la werde.
Politisch korrekte Sprache – Neusprech für Fortgeschrittene I chas nume empfehle z’lese. Mi hets zum schmunzle und ab und zue am Chopf chratze bracht 🙂
-
D’Bohne het hüt e richtige Bsuechstag gha. Zersch si ihri Ur-Oma, mini Gotte u ihre Maa cho. Speter si no 2 Arbeitskollegine vor Manu cho.
Und d’Bohne het sech vor beste Site zeigt – sie isch sehr viu wach gsi u het umegluegt u zablet und nume ganz weni umegrauet. Entsprechend isch wieder mau d’Ussag cho „wartet de nume bis zur Pubertät“ 🙂
-
Mir hei üse Bude-Usflug gha. Am Nami si mir ga Kart fahre in Payerne u am Abe när fein ga ässe im Luce in Bern.
Für mi isches ds’zwoite Mau gsi ufere Kartbahn. Entsprechend bini recht schwach gstartet. Mit jedere witere Rundi bini aber besser u besser dri cho und so hanis im letschte Durchlouf zur zwoitbeste Rundezyt gschafft. I has aber o mau gschafft mi z’verbremse und prompt bini dr’verchehrt Weg näbe dr’Strecke glandet 🙂