Bim Znacht ässe het d’Laura plötzlech agfange „Gugus, Dada“ z’spiele mit ihrem Nuschi. Da hei mir natürlech ghoufe mitspiele. MEHR ANZEIGEN
Ds’vor churzem uf Ricardo ersteigerete Brettspiu „Formula D“ isch e Voutreffer. D’Manu u ig hei üs grad mehrmaus in Monaco es heisses Auto-Renne glieferet mit de zum Teil dümmschte rennfahrerische Entscheide. Echt e glungni Balance zwüsche Istiegerfründlechkeit, Chaos und e Portion Plannig.
Aus erschti Versuechskaninchen hei Reby+Lüku müesse härehaute und knauhert Red u Antwort sta bezüglech em Verzehr vo mine 4-Stunde SpareRibs. Drufabe hei mir dr’Abe miteme gmüetlech Brettspiu la usklinge (drum heisst üsi Brettspiu-Gruppe o „Brot und Spiele“). Ah, und d’Manu het öppe dr’bescht Härdöpfu-Salat gmacht wos je hets gits!
Für aui die wo itz glustig sy und o möchte tafle, häbet Geduld. Leider isch dr’Grill z’chli zum meh aus 3 kg SpareRibs z’mache u drum chöi mir euch nid aui glichzytig ilade.
Aber dr’Summer isch no länge, da wird sech ja sicher öppis ergä.
Mir hei das schöne Wätter gnosse u sy ufe Spiuplatz üs chli ga ustobe.
Üsi soebe beendeti Partie vo Pandemie Legacy isch a Spannig chum z’überbiete. Dr’Sieg isch uf derart uf dr’Kippi gsy, dass mir nume ke einzigi Charte meh hätte dörfe ufdecke… Aber so sy mir siegriich bliebe u hei d’Menschheit o im Juni (Story-Kampagne) grettet.
Am Donnschtigs-Spiuabe im phönix isch hüt e Journalischt verbi cho wüu er e Artiku zu Brettspiu ir Jungfrou Zytig wott schrybe. I bi gspannt was er schrybt, u obi no ufeme Photo wirde druffe sy :)
Nachdem i syt afangs Jahr regumässig dr’Donnschtigs Spiu-Abe im phönix bsueche, bini hüt o ad’Thuner Spiunacht. Totau sy mir guet 25 Persone gsy wo hei mitgmacht, was mitunger o zumne 10-Spieler „Nobody is Perfect“ het gfüehrt.
Im gnennti Spiu muess jede Spieler müglechi Antworte uf abstrusi Frage erfinde u när versuecht mä unger au dene komische Antworte die richtigi use z’errate… Mit 10 Spieler wird das zum puure Chaos 😀
D’Thuner Spiunacht wird vom Thuner Spiufachgschäft phönix spiele organisiert und mit Spiu versorgt.