I ha dr’Audi am Morge zur AMAG bracht füre Service. Bimne Kaffee het mi dr’Service-Mitarbeiter gfragt ob grad Öppis aliege mitem Fahrzüg.
Mir si da de scho einigi Frage i Sinn cho (zB wägem Biifahrer-Airbag und dr’Baby-Schale, dr’überifrige Wöschdüse für d’Xenon-Liecht) und i ha ihm vo mine neu ersteigerete Felge verzeut (dene hie).
Im Verlouf vom Namitag hani es Telefon übercho vom Mitarbeiter woner mir churz bestätiget het, dass mitem Chare aus i beschter Ornig sig. Es het sech aber usegsteut, dass d’Felge doch nid uf mi A4 passe. Dr’Nabedurchmesser isch ds’Problem (sone Seich, da liest me e haube Roman o Fore-Biträg u ke Einzige erwähnt öppis vom Nabedurchmesser…)
Woni am Abe dr’Chare ha abghout, het mi d’Empfangs-Dame gfragt obi mit mim Werkstatt-Ufenthaut zfriede sig. I ha ihre gantwortet, dassi sehr zfriede sig (bini doch umfassend berate worde bi mine Frage) und das sie mitem einzige Ärgernis vom Auto Nüt derfür chönge.
Ou botz, da het sie de grad sofort meh wöue wüsse. Es sig ja ihri Ufgab dr’Chund i aune Belange z’friede z’steue. „Da cha mä uf jede Fau Öppis mache – mir hei ja gnue Felge a Lager.“
U so het sie mi Fau itz intern witergleitet und i sött vor AMAG demnächst kontaktiert wärde.
I bi sehr gspannt, aber vorauem o gueter Dinge, dass es doch no klappet mit asprechende Felge dä Summer.