-
Sandras Fortschritte gö wyter – syt churzem isch sie immer wieder am Singe. Meistens singt sie Mani Matters „Heidi, mir wei di beidi“.
-
D’Sandra macht em Päpu es paar Sache nache wo nid unbedingt die pädagogisch wertvouste Lektione sy 🙂
-
D’Manu u d’Sandra sy scho am Nami ds’Schenkon gsy u hei Sandras Grosi (mis Mami) bsuecht. I bi nachem Fyrabe o verbi u mir sy miteme feine Znacht bechochet worde.
-
D’Sandra het hüt mit em Rütsche uf der Rutschbahn i üsem Quartier gar nid gnue übercho. Nach paarmau mit Hiuf s Stägeli ufe chlättere, hett sie scho rächt gly abgwehrt u het säuber wöue. Chum isch sie nachem Rütsche dunge acho, het sie grüeft ‚meeh‘ und isch sofort wider zum Stägli gsprunge 🙂
-
Mir schynt aus würd d’Sandra dieser Tage jede Tag es neus Wort lehre. Eis vo de neuere, wo mi fasch verputzt isch „Bousi“ — Auerdings heisst das für d’Bohne „Gonfi“, was sech nid ganz deckt mit dem wo ig kenne 🙂
-
I ha hüt churzerhand d Haarschäri, woni im Dütsche gkouft ha, a der Sandra teschtet. Jetz het sie zwar kes VoKuHiLa (Vorne kurz, hinten lang) meh, drfür gseht sie no chly meh wienes Büebli us 😉
-
D Sandra isch hüt mit mir zum Zahni id Kontrolle. Da sy ja inzwüsche o paar Zähn het (ca 14 Stk), het o sie ihres Muu ufgrisse und ihri Zähn zeigt. Es het ihre gloub no Spass gmacht, am Reto (dr Zahni) ds zeige, wo sie überau scho Zähn het.
-
Eigetlech hei mir mit John u Sandra (sire Fründin) nume abgmacht zum Eis ga z’zieh. Vor luter Quatsche isches so spät worde, dass mir no grad es gmeinsams Znacht aghänkt hei.
-
Wemer grad bim Rede sy: Sandras neuschts Wort isch „tunig“ (usgsproche wie gschrybe) wo sie jewius seit we ihre Öppis nid passt u sie e Lätsch schriist derzue 🙂
„tunig“ = truurig
-
Im Moment macht d’Bohne grad wieder rechti Gümp. Sie redt itz meh u meh u versuecht o geng meh nache z’plappere. Super härzig, wenn o teilwies recht schwierig.