-
Üsi Brettspiu-Gruppe het sech troffe zum gmeinsam Sylvestere u während de nid-kritische Stunde no chli z’spiele. So macht das richtig Freud: im gmüetleche Rahme mit guete Fründe u feinem Esse.
-
U Botz ma das plötzlech schneie. Mir sy nume angerhaub Stung z’Bsuech gsy bi Moors u scho isch dr’Chare wiis gsy… D’Heifahrt isch du spannend worde bi so verschneite Strasseverhäutnis, aber dank 4×4 hei mir nie banget.
Und ja, mi het’s hie und da furchtbar gjuckt chli umeztuble mitem Chare (Füdle la usbreche u so). Aber solang i nid allei dinne hocke, chunnt so Öppis nid i Frag.
-
Ds’schönschte Wiehnachtsgschenk chunnt vor Sandra a d’Manu – lang het d’Manu müesse warte, itz aber wird sie Mami gnennt vor Bohne, öppis wo sie scho so druf planget het.
-
Ds’Götti Andrea u Familie hei üs zum wiehnächtele bi ihne in Chnoflige iglade. Das isch es echts Generationtreffe vo Angerhaub bis 85.
Mir hei dieses Jahr o z’erschte Mau gwichtelet i dere Rundi. Vo üs us gseh e voue Erfoug, überchome doch die Erwachsene so o chli öppis 🙂
-
Itz wo d’Sandra bewusster mitüberchunnt was u wie Wiehnachte so louft, hei mir ds Fescht o bi üs in Heimberg gfyret. Mir hei chli müesse improvisiere zum 7 Plätz ine z’bringe u hei drum churzerhand dr’Gartetisch i ds’Wohnzimmer züglet 🙂
-
Mit Mamis Hiuf get d’Sandra hüt ihri erschte Gutzeli gmacht und het derbi wie erwartet einiges von Teig gschnouset 🙂 Mä kennts ja, mir sy nid besser (gsy).
-
Z’Schenke hei mir ds’erschte Wiehnachts-Fescht bi mim Mami und em Brösi fyre. Für d’Sandra isches sogar die erschti Wiehnachte wo sie bewusst het mitübercho – sie het sech sehr guet gmacht u o dr’Boum isch nie i Gfahr grate 🙂
-
Hüt hei mir d’Sandra igspannet zum bi de letschte Schritte vo ihrne Wiehnachtsgshenkli mit azpacke. Bastle mit ihre verlouft aber nid immer wie plannet 🙂
-
D’Sandra cha itz scho rückwärts loufe (träppele), was schinbar überhoupt nid sebstverständlech isch für ihres Auter (so hei mir hüt erfahre).
-
Bimene Bsüechli bi Moors hei mir dr’Noah Mael dörfe lehre kenne. Er isch scho cheibe wiff u het scho aktiv versuecht dr’Chopf z’lüpfe u umezluege woner bi mir ar Schultere isch gsy. I stuune.
Mi het o sehr gfreut wie d’Bohne mitem Elija und em Joshua het chönne spiele. Ömu zytewys, denn aber derfür umso besser 🙂