Schnaaarch…
D’Sandra het usnahmswiis d’Mittagsrueh/Pfüsu dörfe i der Stube mache. Mir hei üs ds Sofa teilt. U es schint aus wär si rächt müed gsy… 
Juhuuu, fertig mit Chinderchleidli…
Nachdäm ig bereits vor ere Wuche s Chleidli für d Laura füre Mittelaltermärit ha fertiggstellt, hani du doch no öppis für d‘ Sandra afa schnurpfe. Hüt isches fertig worde – und ig bi zfridener aus ig hätt dänkt. Isch würklech hübsch worde 🙂 laat sech durchus la gseh.
S Chleidli vo der Laura
D’Sandra het hüt es neus Kapitu ufgschlage. Der erscht Spieugruppe-Tag. Es het ihre wahnsinnig gfaue u si freut sech scho u fescht uf nächst Dsischtig :)
Sit churzem sy mir Mitglied bim Quartierleist. Hüt isch bir Schueu es Pizzaässe organisiert gsy, womer o sy gange. De hei mir mau chly d’Lüt chönne lehre kenne und d’Pizzene sy superfein gsy.
Juhuuuu… Ferie buechet :) Italiä mir chöme :)))
Geit tatsächlech nümm so lang…
I bi ume eis am schnurpfe… :)
Ändi Ougschte isch bi üs ds Kiesen es Mittuauterfescht. U da d’Ching no nüt aständigs zum Alegge hei, hani nach langem hin u här – bschteue oder nid… mi doch für säuber mache entschide. Das isch mau er Laura ihres Kostüm wo’s no nid fertig isch.
Sit paar wenige Wuche hani öppis neus agfange.
Da d’Sandra duurend het d’Zunge usegstreckt, hani d’Idee gha, dass si für jede Tag ohni Zunge usestrecke es 🙂 überchunnt u a dä Täg wos nid gklappt sofort es :(.
Wesi drü 🙂 ufem Papier het, giuts aus Guetschiin wosi när darf ilöse gäg öppis vo ca 5 Sache. Ir letschti funktionierts extrem guet… bi mer scho am überlegge, öbs d Chläberli wäg angerne Sache söu gäh (da si geng der glichWunsch het.. ä Trickfium wünsche).
Hüt Nami resp. zum z’Nacht sy mir hüt bi Tanä u Simu Brunner iglade gsy. Si wohne jetz sehr schön u gmüetlech. Mir hei dä Nami u Abe sehr gnosse bi ihne.
50 Jahr ghürate
Das isch cheibe lang. Mi Unggle Franz und sini Frou d’Annelies hei di ganz Verwandtschaft iglade zu däm Fescht. Es isch super organisiert gsy u ds ässe ungloublech fein. Chly schad isch gsy, dass drü vo üs di meischti Zyt im Notfau bi der Insu verbracht hei 🙁
D’Sandra het irgendwo dri glängt u het sech zimlech wüescht i lingg Ringfinger gschnitte. Isch aber mau wider ganz e Tapferi gsy a däm Tag. U wo mir wider uf d Feschtgmeinschaft sy gstosse het si o wider öppis ds verzeue gha.