-
Isch das herrlechs Wätter gsy! Mir hei hüt no s Grosi ds Bsuech gha u der räscht vom Nami het d‘ Sandra im Bassin verbracht.
-
D’Sandra het mir hüt erklärt dass ihres Bäbi „truurig isch wüu’s nid darf fouge“. Auso ganz ehrlech, i finge so Ussage eifach nume härzig u köstlech, o wes zum Teil Seich isch wo ke Sinn macht. Oder drum grad bsungers.
-
Hüt hei mer im MuKi-Turne der Abschluss gha. Das heisst, aui hei öppis mitbracht u mir hei Picknickt u es het di ganz Familie chönne mitcho. Jetz isch Pouse mitem Turne bis mitti Ougschte.
-
Hüt hei d’Girls und ig rächt es Programm gha. Mit Kömmerle, uf Thun mitem Bus für Lauras ID ds mache u wider retour, es Bsüechli im Kafi woni gschaffet ha und zu gueter Letscht schön lange Ufenthaut ufem grosse Spieuplatz bi der Schueu.
-
D’Sandra het mir hüt verzeut dass sie mis Bad putzt het, speter hani vor Manu no erfahre, dass o mini Zahnbürste isch putzt worde… Na, da bini aber mau gspannt :)
-
D’Sandra het am 32. Heimberger Giele- u Meitlilouf mitgmacht, ir Kategorie Bambini het sie so 300 Meter müesse seckle.
Bi de Chlinschte het jewius e Eltere-Teil dörfe mitseckle.
-
I wierde geng besser mit em Zöpfle 🙂 mit Sandras fiine Haar isches schono so usefordernd.
-
Es isch ungloublech wi schnäu die Ching wachse. Bim hütige Termin vor Müettereberatig hei mer festgsteut, dass d’Sandra scho 96,5 cm u d’Laura 69 cm isch. U zäme bringe sie scho über 20 kg uf d’Waag (14 & 8).
-
Schön zwüschdüre o chly Ferie ds ha. D’Sandra het jetz grad paar Täg, wosi bi Grosi u Grösi isch – u i dere Zyt chani mau diverses dahei mache, wo süsch nid so gäbig geit. Und d’Laura u ig lehre üs o grad chly angers kenne – mir sy ja sit em Spitau nümme allei gsy.
-
Ds hütige Schlächtwätterprogramm isch super gsy. D’Sandra het sech mit de Fingerfarbe, wo sie zum Geburi het übercho, a der Terrassetüre dörfe ustobe 🙂