-
Mir hei im Aute Tramdepot am John sini Fründin (o e Sandra :)) dörfe lehre kenne und gmeinsam e gmüetleche Abe mit feinem Ässe verbringe.
-
Dr Früehlig chunnt! Bi üsem usgiebige Spaziergang, womer hüt hei gmacht, hei mer so richtig dr Früehlig gspürt, wo ir Luft isch gsy! Mir hei das herrleche Wätter gnosse 🙂
-
I ha hüt d Badehiuf usteschtet, womer chürzlech hei gkouft, da d Sandra mitem Bebe-Badwänndli so fescht het afa umeplansche, dass si die haubi Chuchi unger Wasser gsetzt het 😉 I bimer no nid ganz so sicher, wasi vo dere Badehiuf haute. Gäbig isch sicher, dass me s Bebe nid die ganz Zyt muess häbe…aber ds Wäsche isch nid ganz so eifach, wesi i däm Ding hocket.
-
Bereits am Mändig entdeckt…aber jetz bi ig mir ganz sicher: D Sandra überchunnt e Zahn (unge rächts). Zur Zyt isch sy desswäge rächt hüfig quängelig -leider o ir Nacht- u isch aube wider chly ruhiger, wesi dr Zahngel drann het. I fröie mi aber, de cha si de gly richtig bisse 🙂
-
Genau nün Mönet aut isch sy jetz üsi chlini Bohne. Wachst u gedeiht, schnagget sitwärts u rückwärts, hockt ohni hiuf (aber no nid ohni Chüssi wägem hingeregheie), dräiht sech vom Buch ufe Rügge, brabblet wienes Buech, seit Mami u Päpu – zwar no nid klar, aber mir wüsse, wenn mer gmeint sy, isst jetz scho drü Mahlzyte u das ohni d Nase z rümpfe – im Gägeteu … Mir hei u fröid u es isch schön z gseh, was sy für Fortschritte macht.
-
Hüt hei mer mau wider e Spili-Nammittag gha. Reby u Lüku sy ufs zMittag zunis cho (s Reby het ganz fein asiatisch gkochet) u när hei mer no chly spili gmacht bis em Abe (zwar nur eis Spieu – s Robinson – aber es packt haut äbe scho). Freue mi ufs nächschte mau.
-
So, sit em Mittwuch hei mer d Abemauzyt chönne ifüehre – Griessbrei (resp Getreidebrei). Nachdem s am MI u DO nid ganz so isch usecho, wie ig mir das vorgschteut ha, hei mer du när d Miuch vo üsere bisherige Milch Drink uf Vollmilch umgsteut – und siehe da, mit gnue Fettghaut ir Milch glingt o der Griessbrei. D Sandra het o dä (auso wie aus wosi z Ässe überchunnt) u gärn – nur muess sech der Körper da haut o zersch dra gwöhne.
-
Am Nammittag sy mer de när no s Gotti Andrea, Urs u Sara go bsueche. S Wätter het o grad schön mitgschpiut, dass s Ufeloufe vom Bhf Konolfinge här no schön isch gsy. Ufem Heiwäg isches keni füf Minute gange u d Sandra isch mer im Snaggli ipfuset.
-
Mau wider Zyt für d Müettereberatig. Dismau hei mer rächt lang müesse warte bis mer si dra cho. Üses Meitschi isch jetz 8890 Gramm und 71 cm miteme Chopfumfang vo 45,5 cm.
-
Hüt het d Ste geburi gha u mir sy zum Apéro iglade gsy. D’Sandra und ig sy mitem Zug u Poschi zum Pädu u när si mer aui zämä zu Sterrys witer. Proscht Ste – und es isch u fein gsy, au die säubergmachte Sache.