-
Üsi Bohne het ihri Füess entdeckt. Bsungers lustig finge mir dass sie chuzelig isch und sech bim Füess chafle säuber chuzelet u drum när geng muess gugele.
-
Und wieder e Spiel-Abe *freu*. Mir sy bi Reby und Lüku zumne feine Znacht iglade worde und hei drufabe es für üs neus Spiu lere kenne: (Brändi) Dog. Gemäss em Reby isch üsi Rundi aber viu z’brav usgfaue; es gäb normalerwys meh Fieseleie, Konflikte und erhobeni Stimme. Spass gmacht hets üs trotzdem sehr 🙂
-
Nachdem ds’Gabi am Wuchenend het Geburi gha, aber mir nid hei chönne gratuliere, sy mir haut hüt verbi und hei üser Glückwünsch verbi bracht. Und d’Bohne het o wieder mau ihre Götti Mike gseh.
-
Mir sy ga d’Gotte Ste und dr’Unkle Jerry (Sterrys) bsueche. Bim gmeinsame Choche hets e Familie-Spezialität gä: Cervelat-Forelle. Da chöme Erinnerige a die eigeti Chindheit 🙂
-
Sandra u mini erschti gmeinsami Mahlzyt am Tisch 🙂
-
Nach einigem organisiere hei mirs mau wieder gschafft e Spiu-Abe düre z’füehre. Zersch hei mir üs miteme feine Fondue gstärcht, drufabe hei mir vorauem ds’kooperative Spiu „Pandemie“ gspiut – und si cheibe guet gsi im Kampf gäge d’Erreger.
Ds’Ziel in „Pandemie“ isches gäge 4 verschiedeni Chrankheits-Erreger Heilmittu z’finge. Immer wenn e Spieler si Zug beendet het, macht me dr’Zug vom Spiu – i dem Fau Chrankheite usbreite und wes dumm geit sogar e Epidemie erzüge. Ds’Spiu schaffts immer wieder innert wenige Züg e schynbar kontrollierti Situation z’erskaliere so dass d’Spieler wieder au Häng vou…
-
Tag 2 vo üsem Reisli – Mir si im Vormittag bi mire Oma und em Rene ga käfele. Im Namitag si mir bim Götti Willi und sire Frou Barbara in Winterthur verbi.
450 Kilometer im Auto hocke hei mir scho möge merke, aber das isch e chline Priis für d’Freud wo mir dran hei (und o d’Freud wo mir üsne Gastgeber hei chönne mache). Ufem Heiweg hei mir spontan no e chline Umweg gmacht und si bim Grosi (mim Mami) ga verbiluege 🙂
-
Tag 1 vo üsem Ost-Schwyz-Wuchenend: Mir si bir Gotte Bigi und Familie in Stamme z’Bsuech gsi, hei e gmüetleche Abe zäme chönne verbringe und o grad bi ihne übernachte.
I ha o wieder mau mini Cousine und Cousins gseh. Das isch ds’letschte Mau o scho chli länger her…
-
Manus Gotte Beatrice und ihre Maa, dr’Geru, si zu üs cho e Tartare-Huet gniesse. Aaschliessend hei mir bis i die früehe Morgestunde dorfet und glachet.
-
Mir hei spontan ds’Reby u dr’Lüku iglade zum e Abe lang Munchkin spiele. Normalerwys duuret das Chartespiu nid so lang, aber mir hei chli e zaghafte Start gha – und uf ds’Endi here hei mir üs Chneble zwüsche d’Scheiche gworfe wenn immer müglech. E riese Spass!