-
D’Manu het mir hüt am Abe e grossi Freud gmacht und vorgschlage mis neue Brettspiu häufe z’versueche. Es isch durchus no es aspruchsvou, umso meh freut’s mi wie guet d’Manu i ihrer erschte Partie gspiut het. Respekt!
-
Miner Froue hei hüt zäme güetzelet (u wahrschinlech o viu gschnouset ;)).
-
D’Sandra isch zum erschte Mau live amene SCB-Match derbi gsy und het sehr möge rüehme wie toll dass es sig und wie guet es ihre het gfaue.
Mir hei üs extra es Spiu vor Champions Hockey League usgsuecht wüu die erfahrigsgemäss weniger Zueschouer hei. Auerdings sy mir de glich scho nachem erschte Drittu wieder hei wüu’s sehr chaut isch gsy und d’Sandra de doch het afa unruiger werde.
-
Zur Fyr vo Ueli sim Geburtstag sy mir Manus Eutere ga bsueche und hei zäme käfelet, verzeut und dr’Ueli miteme Dia-Scanner überrascht, so dass ihm ir bevorstehende Pension o ja nid längwielig wird.
-
Nachdem mir bereits über ne ganzi Saison Bsitzer vo 2 Sitzplätz im Berner Hockey-Tempu sy, het’s d’Manu endlech o mau gschafft live im Stadio derbi z’sy – sie het de no grad e wunderbare 5:0 dörfe gniesse.
-
So, Manu u ig hei i de letschte 3 Monet üses Trainingsprogramm sehr guet dürezoge u si totau uf je öppe 40 Trainings-Tage cho mit Schwitze, Chüüche, Flueche u Muskukater. Aber es het sech glohnt u mir werde wyterhin dran bliebe.
-
Mir hei d’Andrea, Mischu, Urs und Sara zu SpareRibs vom Grill (4-5 Schtung ufem Grill :)) iglade und gmeinsam lecker u deftig möge mampfe. Üs stört’s da o überhoupt nid, dass dr’Summer langsam Gschicht isch und d’Tage geng chüehler wärde…
-
Lang het’s duuret bis mir wieder mau e Spiu-Abe hei zstang bracht – derfür het’s umso meh gfägt nach so langer Zyt. Und dr’Kolleg het de o grad sini früschi Fründin mitbracht und se mit dr Brettspiu-Begeisterig agsteckt.
-
I ha hüt mine Ouge chum trout, woni ufem Sofa bi ghocket u öppis ha gläse… U sech da plötzlech d’Laura am Sofa ufezieht, bis sie meh oder weniger uf de Füess gstange isch 🙂
-
D’Laura isch umzoge.
Nachdäm das mit däm gmeinsame Zimmer in Spanie so guet klappt het, isch d’Laura am Sunnti zur Sandra umzoge. Mir sy no nid ganz ds Fride mit der Möblierig, aber fürs erschte passts eso. D’Sandra het chürzlech am Mittag nachem Pfüsu grad müesse zur Laura is Bett go schmuse 😉