Familie Wäger

Nachdäm mir di Wuche hei erfahre wi gross d’Laura isch, hei mer doch o mau wöue luege, wie d’Sandra so gwachse isch. Jetz isch si o scho 1 Meter u 04 cm.

März 19, 2017
Da mis Ührli mau wider ä nöii Batterie het brucht, hani hüt mau wider uf Thun müesse. D’Sandra het dörfe mitcho. Mir sy mitem Bus ine u mitem Zug zrügg. D’Wartezyt ufs Ührli hei mer mit Lädele verbracht – u hei vieu spass gha. Ufem Rückwäg hätt öppe nid vieu gfäut u si wär im Zug ipfuset 🙂

März 18, 2017
Eifach Wätter gniesse u blüemele 🙂

D’Sandra füut im Moment der Pulli mit Margritli nomau u nomau… i weiss scho bau nümm, woni dermit häre söu 😉 i ha ihre o gseit, si söu doch no paari für d’Biendli wägem Honig lasi, u si het gmeint: aber mir hei ja im Chäuer no Honig 🍯

März 17, 2017
O hüt bini nomau Verträtigswis go Schwümme mit der Sandra. Nachdäms letscht mau nid glich eifach isch gsy, d’Sandra zrügg ds pfiffe wöu si regumässig angers vor het gha, aus vorgäh – isches dismau grad dütlech ringer gange, dass si gfouget het.

März 16, 2017
Am Nami simer mau wider eis i der Müettereberatig gsy. D’Laura misst jetz scho 82 cm u isch chly meh aus 10 kg schwär. D’Sandra het sech riisig gfreut, dass si der ganz Wäg mitem Trotti het dörfe mitcho. Und nach üsem Termin, si mer no es Cherli zu de Geissli go mache u hei das tolle Wätter gnosse.

März 15, 2017
Hüt sy mau d’Froue drann gsy mit SCB live 😄 s‘ Reby u ig hei üs e tolle Abe chönne mache u hei ä sehr interessante Mätsch im Tämpu dörfe gniesse, während d’Manne bi de Ching dahei der Mätsch hei vorem TV gluegt.

März 14, 2017
Nachdäm d’Laura inzwüsche rächt guet dinne desume gwatschlet isch, het si sech hüt o ufem Terrasse- und sogar ufem Grasbode ohni Hiuf vorwärts gwagt.

März 13, 2017
Obwou dr’SCB das Spiu gäge Biel isch zwar verlore gange, aber was d’Stimmig im Stadion ageit hani gloub no nie e derart geile Match erlebt. Im letschte Drittu (Bern isch mit 5:1 hinger gsy) het d’Stehrampa mau richtig afa aheize und mit dr’Euphorie o aui ufe de Sitzplätz möge mitrisse. Botz geit das ab we 16’000 Fans ihres Team afüre!

März 9, 2017
Da d’Marianne i de Ferie isch, bi ig verträtigswiis mit der Sandra is Chinderschwümme u mis Mami isch d’Laura cho hüete. Es het cheibä gfägt. I bi am Abe nachem Bade u nachem Muki aber ömu o e Biz kaputt gsy.

März 9, 2017
I ha hüt Nami s schlächte Wätter mau wider chly kreativ gnutzt. D’Sandra het dörfe wünsche, wasi ihre söu male – sie het sech fürne Hund entschide.

März 7, 2017