Familie Wäger

Neui Wysheite vor Sandra bim zVieri: „I ma nid geng so lang warte bis ig fertig bi.“

November 18, 2016
So schön, hüt Morge het mir d’Waag numeno 82.5 kg azeigt.

November 15, 2016
Das isch hüt e wunderbar geile Match gsy gäge d’Luganesi. Obwou mit no zmitzt ir Saison sy het sech’s scho vei nach Play-Offs agfüeut – spannends Spiu, u viu Emotione uf und nebem Fäud.

November 12, 2016
D Laura überchunnt mittlerwiele ihre dritt Zahn – die rechti oberi Schufle. Es chunnt ihre grad recht, wott sie doch numeno ds gliche esse wie o mir uf de Teller hei.

November 6, 2016
Nach langer Zyt hanis ume einisch chönne irichte bim Umut in Bümpliz e Kebab-Teller ga z’ässe ä. Die Teller sy eifach ire eigete Liga – het doch sogar dr Lüku nachem Esse gmeint es heig gar nüm viu gfäut und er hätt müesse ufgä. Und er ma eigetlech öppe geng meh weder i ässe.

November 5, 2016
Was für ne Match ir Champions Hockey League gäge JYP Jyvaskyla (FIN). Nacheme verpatzte Start-Drittu (u 2 Gou im hingerlig) hei d Mutze ufdreit u am Schluss mit 3:2 e Sieg igfahre ä.

November 1, 2016
Nach 36 Jahr BERNMobil isch dr Ueli Eggimann (dr Ätti) i Pension gange. Mir hei ihn zum Zmittag mitere Tramfahrt im Fondue-Tram überrascht (leider ohni Fondue) u am Namitag het er de no zum Apero glade.

Ir grosse Pouseruum vo BERNMobil hei de Uelis Grossching sech am Töggeli-Chaschte versuecht. https://youtu.be/OiIaZwULZDw

Oktober 31, 2016
So herzig – ir Drittus-Pouse vom Match SCB gäge EHC Biel hei d Bambini sich es churzes Geplänku glieferet. Sicherlech no idrücklech vor dere Kulisse 🙂

https://youtu.be/LOaj0Gkhy2o

Oktober 29, 2016
I ha im Oktober bereits zum vierte Mau e Gwinn bim Lotto spiele — 3x e 3er und 1x Replay. Süsch hani gloub no nie würklech Gäut gwunne, aber itz chani’s plötzlech.

Oktober 27, 2016
D’Manu het mir hüt am Abe e grossi Freud gmacht und vorgschlage mis neue Brettspiu häufe z’versueche. Es isch durchus no es aspruchsvou, umso meh freut’s mi wie guet d’Manu i ihrer erschte Partie gspiut het. Respekt!

Oktober 19, 2016