Familie Wäger

Nachem Fescht-Marathon vo de letschte Tage, heiirs nid chönne la sy u hei hüt no Ueli u Monika bi üs iglade zum Raclette mit Tischgrill.

We d’Wohnig scho schmeckt vom Tatarehuet, de müesse mir die Glegeheit doch nutze 🙂

Dezember 26, 2014
Ds’Götti Andrea u Familie hei üs zum wiehnächtele bi ihne in Chnoflige iglade. Das isch es echts Generationtreffe vo Angerhaub bis 85.

Mir hei dieses Jahr o z’erschte Mau gwichtelet i dere Rundi. Vo üs us gseh e voue Erfoug, überchome doch die Erwachsene so o chli öppis 🙂

Dezember 25, 2014
Itz wo d’Sandra bewusster mitüberchunnt was u wie Wiehnachte so louft, hei mir ds Fescht o bi üs in Heimberg gfyret. Mir hei chli müesse improvisiere zum 7 Plätz ine z’bringe u hei drum churzerhand dr’Gartetisch i ds’Wohnzimmer züglet 🙂

Dezember 24, 2014
O d’Mutze sy i Wiehnachts-Stimmig u hei i ihrem letschte Match im 2014 d’Tabelle-Füehrig überno – es super Gschenk für d’Mannschaft u für d’Fans.

Dezember 23, 2014
So günstig wie vori grad hani öppe no nie tanket syt i cha Auto fahre… I ha grad mau 1.45 zaut pro Liter.

Dezember 22, 2014
Mit Mamis Hiuf get d’Sandra hüt ihri erschte Gutzeli gmacht und het derbi wie erwartet einiges von Teig gschnouset 🙂 Mä kennts ja, mir sy nid besser (gsy).

Dezember 21, 2014
Z’Schenke hei mir ds’erschte Wiehnachts-Fescht bi mim Mami und em Brösi fyre. Für d’Sandra isches sogar die erschti Wiehnachte wo sie bewusst het mitübercho – sie het sech sehr guet gmacht u o dr’Boum isch nie i Gfahr grate 🙂

Dezember 20, 2014
Hüt hei mir d’Sandra igspannet zum bi de letschte Schritte vo ihrne Wiehnachtsgshenkli mit azpacke. Bastle mit ihre verlouft aber nid immer wie plannet 🙂

Dezember 19, 2014
D’Sandra cha itz scho rückwärts loufe (träppele), was schinbar überhoupt nid sebstverständlech isch für ihres Auter (so hei mir hüt erfahre).

Dezember 18, 2014
Und da isches! Das Spiu woni fasch 8 Monet ha druf gwartet isch hüt erfougrich überbracht worde. Es gseht super us – bsungers die metallische Münze wo extra sy gmacht worde. Dr’Hammer!

Dezember 17, 2014