50 Jahr ghürate
Das isch cheibe lang. Mi Unggle Franz und sini Frou d’Annelies hei di ganz Verwandtschaft iglade zu däm Fescht. Es isch super organisiert gsy u ds ässe ungloublech fein. Chly schad isch gsy, dass drü vo üs di meischti Zyt im Notfau bi der Insu verbracht hei 🙁
D’Sandra het irgendwo dri glängt u het sech zimlech wüescht i lingg Ringfinger gschnitte. Isch aber mau wider ganz e Tapferi gsy a däm Tag. U wo mir wider uf d Feschtgmeinschaft sy gstosse het si o wider öppis ds verzeue gha.
Wider gsund…
Nachem Bsuech bim Musical am Donnschtig, isches mer du plötzlech nümm so guet gange 🙁
Nach paar Täg im Bett mit Mage-Darm-Problem hanis jetz o wider einigermasse ufd Bei gschafft u bi wider richtig fit.
D’Sandra geit so ungloublech gärn zum Grosi id Ferie… da isch sy richtig happy gsy, dases hüt mau wider so wit isch gsy.
Zum Dank fürs Hüete vo de Ching, hani mit beidne Grosis ä tolle Abe gmacht. Mir drü Froue sy üs CATS go aluege bi de Thunerseespiel. Es isch sehr idrücklech gsy. Das het sech uf jede Fau glohnt.
Mir gniesse der Summer :)
Pädu het uf Ricardo es paar Strassehockey-Chneble inkl Tor ersteigeret. U hets mit der Sandra natürlech grad usteschtet.
Minigolf
Mit der Dameriege sy mer hüt go Mini-Göifle. I ha das scho ewig nümm gmacht (bi o mit Abstand di Schlechteschti gsy). Es het aber u gfägt. U hingerhär sy mer im CIS no go ässe.
Mir sy hüt mit mine Eutere go ds Nacht ässe im Han ds Thun. Isch für sie öppis neus gsy, das hei si so no nid gkennt. U für üs ischs sehr entspannend gsy, wöu s Reby dahei uf üser Ching het ufpasst.
Da Susi (Schwagers Mami) disi Wuche e runde Geburi het dörfe fyre, sy mir ir Region Luzern iglade gsy im Restaurant Chärnsmatte go ds Brunche/Mittag/Dessert ässe. Dert hets zuesätzlech ä riiise Spieuplatz mit mini-Bähndli u Karussell etc. aso diversi Sache wo d’Ching u fröid hei. Ds Ässe isch fein gsy u d’Ching hei o ä rise Plousch gha.
