Zum Inhalt springen

Familie Wäger

Brot und Spiele 😉

Diese Sunnti Namitag si Reby und Lüku zu üs cho und mir hei üs nume so dür d’Brettspiu daddlet und glichzytig d’Grillsaison eröffnet 🙂

Mir hei d’Spiu viu Spass gmacht, aber i wünschti mir scho, dass mir ds’Robinson o mau verliere we mer z’Vierte höch spiele. We d’Manu ug ig z’Zwoite höch spiele, de isches nämlech öppe 50-50 ob mir uf dr’Insle überlebe oder sterbe 🙂 Robinson isch es kooperativs Spiu wo verschiedeni Szenarie bietet rund um ds’Thema…

März 2, 2014
Vouer Freud hei mir üs ufe Weg nach Schenkon gmacht zum mim Mami zum Geburi z’gratuliere. Grosi u Grösi isches aber fasch meh um d’Sandra gange 🙂

März 1, 2014
Mir hei im Aute Tramdepot am John sini Fründin (o e Sandra :)) dörfe lehre kenne und gmeinsam e gmüetleche Abe mit feinem Ässe verbringe.

Februar 28, 2014
I mire Mittags-Pouse bi ig ufene Video gstosse wo nume so vo Nerdtum trieft, glichzytig aber schlechter fasch nüm cha si 🙁

Dr’Sänger, Leonard Nimoy, isch dr’Darsteller vo Spock us Star Trek (Spock isch dä wo d’Finger so komisch spreizt zum grüesse). Bilbo Baggins heisst uf Dütsch Bilbo Beutlin und isch dr’aut Hobbit us de Herr der Ringe Filme. http://www.youtube.com/watch?v=AGF5ROpjRAU

Februar 28, 2014
Dr Früehlig chunnt! Bi üsem usgiebige Spaziergang, womer hüt hei gmacht, hei mer so richtig dr Früehlig gspürt, wo ir Luft isch gsy! Mir hei das herrleche Wätter gnosse 🙂

Februar 23, 2014
I ha hüt d Badehiuf usteschtet, womer chürzlech hei gkouft, da d Sandra mitem Bebe-Badwänndli so fescht het afa umeplansche, dass si die haubi Chuchi unger Wasser gsetzt het 😉 I bimer no nid ganz so sicher, wasi vo dere Badehiuf haute. Gäbig isch sicher, dass me s Bebe nid die ganz Zyt muess häbe…aber ds Wäsche isch nid ganz so eifach, wesi i däm Ding hocket.

Februar 22, 2014
Bereits am Mändig entdeckt…aber jetz bi ig mir ganz sicher: D Sandra überchunnt e Zahn (unge rächts). Zur Zyt isch sy desswäge rächt hüfig quängelig -leider o ir Nacht- u isch aube wider chly ruhiger, wesi dr Zahngel drann het. I fröie mi aber, de cha si de gly richtig bisse 🙂

Februar 20, 2014
Genau nün Mönet aut isch sy jetz üsi chlini Bohne. Wachst u gedeiht, schnagget sitwärts u rückwärts, hockt ohni hiuf (aber no nid ohni Chüssi wägem hingeregheie), dräiht sech vom Buch ufe Rügge, brabblet wienes Buech, seit Mami u Päpu – zwar no nid klar, aber mir wüsse, wenn mer gmeint sy, isst jetz scho drü Mahlzyte u das ohni d Nase z rümpfe – im Gägeteu … Mir hei u fröid u es isch schön z gseh, was sy für Fortschritte macht.

Februar 17, 2014
Hüt hei mer mau wider e Spili-Nammittag gha. Reby u Lüku sy ufs zMittag zunis cho (s Reby het ganz fein asiatisch gkochet) u när hei mer no chly spili gmacht bis em Abe (zwar nur eis Spieu – s Robinson – aber es packt haut äbe scho). Freue mi ufs nächschte mau.

Februar 16, 2014
So, sit em Mittwuch hei mer d Abemauzyt chönne ifüehre – Griessbrei (resp Getreidebrei). Nachdem s am MI u DO nid ganz so isch usecho, wie ig mir das vorgschteut ha, hei mer du när d Miuch vo üsere bisherige Milch Drink uf Vollmilch umgsteut – und siehe da, mit gnue Fettghaut ir Milch glingt o der Griessbrei. D Sandra het o dä (auso wie aus wosi z Ässe überchunnt) u gärn – nur muess sech der Körper da haut o zersch dra gwöhne.

Februar 14, 2014

←Vorherige Seite

1 … 64 65 66 67 68 … 108

Nächste Seite→

Stolz präsentiert von WordPress