Familie Wäger

Mir hei e wyteri Charte vo/zu üsem Hochzyt übercho. Diesi isch mit „Liebi Grüess, Ig“ ungerschrybe worde 🙂 Viele Dank em „anonyme“ Absender, mir hei guet glachet.

Januar 18, 2014
Uff, die Wuche hets durchus in sich gha. I ha e Schweti vo chline Änderige und Ufgabe gha, und so es paar Überstunde gsammlet. Aber itz isch ume viu besser, ha ig doch öppe aui mini Pendenze chönne abschliesse.

Januar 17, 2014
Itz plötzlech faht d’Sandra bim Ischlaf-Liedli a mitsinge. Sie nutzt zwar nume 1 Ton, aber das kompensiert sie mit Lutsterchi. D’Manu gheit regumässig drus vor Lache

Januar 15, 2014
Mit viu Müeh und Fantasie hei mirs gschafft und us dene Buechstabe (und Zahle) chönne Sandra Leia, sowie 17. 05. schrybe. Die restleche Puzzleteili hei mir när eifach no irgendwie häre ta.

Januar 13, 2014
Ds’Grosi und dr’Grösi hei üs es Bsüechli abgstattet. Da ds’Wetter isch guet gsi, sy mir du o no grad chli ga loufe – bis zum Zulgspitz u ume zrügg.

Januar 12, 2014
Mir hei e Spielmatte gfunge für d’Sandra. So cha sie eifach am Bode liege und umespiele, schnaage et cetera und isch glich nid direkt ufem Steibode. Die viele Farbe gfaue ihre gloub o guet

Januar 11, 2014
Üsi chlini Bohne plouderet immer meh und meh. Im Moment isch „Tätätä … tä“ grad sehr höch im Kurs.

Januar 10, 2014
D’Sandra u ig hei hüt mau wider e Termin bi der Müettereberatig gha. Si isch jetz bereits 8.63 kg und 69 cm. Ungloublech, wie schnäu dases geit. Am Nammittag het si no Naturejoghurt lehre kenne. I hare chly bloss z Probiere gäh, bevor is bi ihre is zVieri ha gmischt. Ihri Reaktion: „mmmmmhhmmmm“ – u grad wider s Müli ufgrisse für meh 🙂

Januar 8, 2014
Ds’Jahr isch zwar scho fasch e Wuche alt, was dr’John u mi aber nid ghinderet het uf es guets neus Jahr azstosse bimne Fyrabe-Bier.

Januar 7, 2014
I ha mi Rekord bim 5x5x5 Rubiks Cube uf unger 10 Minute chönne verbessere. E rechti Steigerig wo ig itz wieder chli z’bisse ha dranne.

Januar 5, 2014