Zum Inhalt springen

Familie Wäger

Brot und Spiele 😉

Mir hei spontan ds’Reby u dr’Lüku iglade zum e Abe lang Munchkin spiele. Normalerwys duuret das Chartespiu nid so lang, aber mir hei chli e zaghafte Start gha – und uf ds’Endi here hei mir üs Chneble zwüsche d’Scheiche gworfe wenn immer müglech. E riese Spass!

Oktober 22, 2013
Da d’Sandra ir letschti e rise Hunger schint z ha, hei mir hüt mau es Rüebli zu Mues gmacht und üs chly dra häretaschtet. Si het ömu guet mitgmacht o wesi äuä dere Sach scho no nid so trout het.

Oktober 22, 2013
Mir hei d’Monika und dr’Ueli zumne Tartare-Huet iglade bi üs. Das isch eifach scho es feins Znacht, o wenn d’Hütte när schmöckt… 🙂

Oktober 20, 2013
Üser Dankes-Charte für d’Hochzyts-Gschenk si fertig u müesse itz nume no uf d’Post.

Oktober 19, 2013
Star Wars i üsem Wohnzimmer: Princess Leia vs Wicket, wär gwinnt äch dä Kampf 😉

Oktober 17, 2013
I ha dr Pädu hüt mit eme zNacht ir Krone z Thun (dert hei mer nach dr zivile Hochzyt gässe) chönne überrasche. Es isch, wie o scho im Apriu sehr fein gsy. U zuesätzlech isch für mi Prömiere gsy, dass öpper angers (Reby) zu der Sandra luegt.

Oktober 14, 2013
Üser Hochzyts-Fotos si acho und mir hei se grad mitgno uf Schenkon zum mit mim Mami und em Brösi chönne aluege.

Itz mache mir üs ad’Gstautig vo üsere Dankes-Charte wo dir i absehbarer Zyt i euem Briefchaschte werdet vorfinde.

Oktober 12, 2013
Und no e zwoite Geburtstag diesi Wuche. O dr’Lüku het iglade zu Speiss und Trunk a sim Namenstag. O dir nume ds Beschte zu dim Geburi, herzlechi Glückwünsch.

Oktober 11, 2013
Hüt het’s grad 2 Mails gä vo Chunde wo mi zum Schmunzle bracht hei. Ei Chund het gschrybe er möchti „eine Neuinstallation auf einer Tablette vornehmen“, und e andere Chund „konnte sich nicht mit dem Admin-Benutzer einlochen“.

Da het d’Autokorrektur zwoimau unglücklech zuegschlage 🙂

Oktober 10, 2013
Mir hei e gmüetleche Abe bi Ueli und Monika verbracht. Sie hei iglade wüu dr’Ueli si 60ischt Geburi het gfyret. Herzleche Glückwünsch, blieb so wie de bisch.

Oktober 9, 2013

←Vorherige Seite

1 … 73 74 75 76 77 … 108

Nächste Seite→

Stolz präsentiert von WordPress