-
Diese Morge isch d’Sandra zum erschte Mau vo ihrem Grosi ghüetet worde, während d’Manu es Probeschaffe gmacht het.
Aui Beteiligte hei nume guets wüsse z’verzeue. We d’Manu de Job überchunnt, de wird d’Bohne wüchentlech ds’einte vo beidne Grosis gseh. Ds’angere Grosi wohnt derfür viu nächer 🙂
-
Bin Fyrabe mache hani gseh dass Bumblebee näb mir het parkt. Es schöns Auto, o wenn d’Luftschlitze bim Hingerrad fake und nume ufgmale sy 🙂
-
Mir sy guet in Brüssel acho und hei vo üsem Gastgeber o grad direkt e Sightseeing-Tour übercho (Innestadt, Atomium et cetera). Drufabe sy mir im 2.-grösste Bowling Center vo Europa (Bowling Stones mit 36! Bahne) ga esse.
-
mediacoding gits sit 10 Jahr und so sy mir dick ga esse z’Bern u när no chli dür d’Gasse zoge.
-
E mau chli angere Arbeitstag. I bi hüt Kursleiter gsy für 16 Dame vom Verein Inner Wheel und hane zeigt was ds’Club-System aues cha und wie mä’s am Beschte bedient.
-
Uff, die Wuche hets durchus in sich gha. I ha e Schweti vo chline Änderige und Ufgabe gha, und so es paar Überstunde gsammlet. Aber itz isch ume viu besser, ha ig doch öppe aui mini Pendenze chönne abschliesse.
-
E ganze Tag bini hinger mim Import-Script ghocket und ha gfutteret. Aber es het sech glohnt – i ha dr’Datedurchsatz fasch chönne verdopple und glichzytig d’RAM-Belastig um ~90% reduziere (vo über 1 GB uf ca 90 MB).
-
Diese Morge het mi massiv die senili Bettflucht plaget u so bi ig bereits am 5:30 us de Federe und am 6:00 usem Huus.
I bi eigetlech chli dervo usgange haub leeri Strasse az’treffe (dr’gross Rush id’Stadt isch ja eigetlech zwüsche 7:30 und 8:00). Das het sech de ömu gar nid wöue bewahrheite… Im Schnitt hani öppe knapp 25 unger dr’erloubte Maximau-Gschwindigkeit chöne fahre (bzw müesse blibe 🙁 ).
-
Hüt het’s grad 2 Mails gä vo Chunde wo mi zum Schmunzle bracht hei. Ei Chund het gschrybe er möchti „eine Neuinstallation auf einer Tablette vornehmen“, und e andere Chund „konnte sich nicht mit dem Admin-Benutzer einlochen“.
Da het d’Autokorrektur zwoimau unglücklech zuegschlage 🙂
-
Ds’Coding-Problem woni i de letschte Tage jewius vor mi hergschobe ha, het sech viu eifacher la löse aus erwartet. Woni mi ha dra gsetzt het sech dr’Code fasch vo alleini gschrybe u sofort funktioniert.