Ds’Päckli mit de Brettspiu woni dieser Tage füre Lüku ersteigeret, isch itroffe und es isch doch es recht grosses Päckli worde :) Lüku wird sech freue.
Swiss Toy! Angers aus i vergangene Jahre het mi dr’Video Game Bereich öppe gar nüm interessiert, derfür hani mit Lüku es üs unbekannts Spiu chönne usprobiere, e Hampfele Impuls-Ichouf abwehre (uff, Glück gha :)) und es paar Würfle imne Warhammer Miniature-Match werfe.
Wow, mir hei üs z’sechste höch troffe und e ca 4-stündigs Kampf um Westeros und dr’Iserner Thron gha.
Mir hei Game of Thrones ds’Brettspiu gspiut und i ha bim Uslose usgrächnet die unsympathische Greyjoys verwütscht. Aber jä nu, i ha nes zeigt zu was d’Ise-Männer fähig sy.
Was tot ist, kann niemals sterben.
Vor einige Tag hani es Brettspiu nach Frankrich amene Winzer gschickt und itz ds’Tuschobjekt vo ihm per Post im Briefchaschte gha. E flotti Community :)
Nach geile säuber gmachte Burger hei mir Star Wars: Edge of the Empire (es Pen-and-Paper Rollespiu) gspiut. I ha mi derbi aus GameMaster versuecht und ha müesse merke, dass das cheibe astrengend isch…
Das neue Charte-Spiu (Android Netrunner), woni vorletscht Wuche gchouft ha, isch echt dr’Hit. D’Manu gwinnt meistens aus Hacker und ig aus MegaCorp gseh rächt aut us :(
Aber es zeigt sech, dass da würklech viu Inhaut füre Priis ir Box isch. D’Manu spiut bis itz nume 1 vo 3 mügleche Hacker und i bi o geng die gliich MegaCorp (vo 4 wo zur Uswau stöh).
I ha mir es neus Charte-Spiu (Android: NetRunner) gänggelet und de o grad mit dr’Manu chönne die erschte Rundine spiele.
Es isch nid ganz eifach gsy i ds’Spiu ine z’finge, mittlerwiele klappet’s aber recht guet.
Glichzytig muessi aber o säge, dass das Spiu no viu Müglechkeite bietet we mäs de chli besser kennt.
Mir sy vo Reby und Lüku iglade worde zum Znacht i ihrer neue Wohnig. E schöni Wohnig und sie hei o bereits guet igruumt und sy acho.
Mir hei aus Mitbringsu für ds’früsch zämezüglete Paar ds’Chartespiu „Love Letter“ mitbracht. E voue Erfoug!
Nachem Znacht und zäme dorfe hei mir grad 4 Partie gspiut à je ca 4-6 Rundine. I ha säute schlecht gspiut (d’Charte dürenang bracht, schüsch es Gstürm gmacht oder eifach o nume Pech gha) und ersch ir zehnte Rundi mi erscht Punkt ghout.
Derfür hani dr’Titu „Amüsantischte Spieler“ igheimset 🙂