-
Recht spontan sy hüt Sterrys zumene usgiebige Käfele bi üs verbi cho. D’Sandra het sech riesig gfreut wo sie ihri Gotte ufem Parkplatz entdeckt het u het so luut „Tee“ grüeft, dasses sogar d’Ste dusse ghört het.
-
D’Ste, mi Schwoscht, het zu ihrem letschte Geburtstag miteme 2 am Rügge iglade. Es isch es gmüetlechs zäme-sy mit guete Lüt u feinem Esse (u Desserts) gsy. Happy Birthday, Ste!
-
Recht spontan sy mir zu Manus Eutere (Grosmami u Ätti) zum chli käffele u sy. So hei mir o grad ihres brandneue Sofa „ifurze“.
-
Mir wünsche euch aune es guets Neus u hoffe dir syget guet gstartet i ds’Jahr.
-
Ds’schönschte Wiehnachtsgschenk chunnt vor Sandra a d’Manu – lang het d’Manu müesse warte, itz aber wird sie Mami gnennt vor Bohne, öppis wo sie scho so druf planget het.
-
Nachem Fescht-Marathon vo de letschte Tage, heiirs nid chönne la sy u hei hüt no Ueli u Monika bi üs iglade zum Raclette mit Tischgrill.
We d’Wohnig scho schmeckt vom Tatarehuet, de müesse mir die Glegeheit doch nutze 🙂
-
Ds’Götti Andrea u Familie hei üs zum wiehnächtele bi ihne in Chnoflige iglade. Das isch es echts Generationtreffe vo Angerhaub bis 85.
Mir hei dieses Jahr o z’erschte Mau gwichtelet i dere Rundi. Vo üs us gseh e voue Erfoug, überchome doch die Erwachsene so o chli öppis 🙂
-
Itz wo d’Sandra bewusster mitüberchunnt was u wie Wiehnachte so louft, hei mir ds Fescht o bi üs in Heimberg gfyret. Mir hei chli müesse improvisiere zum 7 Plätz ine z’bringe u hei drum churzerhand dr’Gartetisch i ds’Wohnzimmer züglet 🙂
-
Z’Schenke hei mir ds’erschte Wiehnachts-Fescht bi mim Mami und em Brösi fyre. Für d’Sandra isches sogar die erschti Wiehnachte wo sie bewusst het mitübercho – sie het sech sehr guet gmacht u o dr’Boum isch nie i Gfahr grate 🙂
-
D’Sandra cha itz scho rückwärts loufe (träppele), was schinbar überhoupt nid sebstverständlech isch für ihres Auter (so hei mir hüt erfahre).