-
A mim erschte Ferietag hani no 2-3 Sache ds’Bern wöue/müesse organisiere, und ha die Glägeheit grad gnutzt zum mitem John zäme ga z’Mittag ässe. I ha no grad Glück gha, het er Zyt gha und isch nid vou Termine gsy.
Ufem Weg zrügg hani im Parking de o no grad e säutene Charre gseh: e 3-rädrige Morgan.
-
Zur Fyr vo üser Eidgenosseschaft hei mir iglade u i ha öppis Neus am Grill usprobiert: Pulled Pork. Das sy knapp 2.5 kg Schweinehals woni bereits am Morge am 7ni ufe Grill ta u so öppe 11 Stung la niedergaare.
Es isch sehr fein gsy, aber für nes angers Mau isch mir gloub dä Ufwand nid der Wert.
-
Aus erschti Versuechskaninchen hei Reby+Lüku müesse härehaute und knauhert Red u Antwort sta bezüglech em Verzehr vo mine 4-Stunde SpareRibs. Drufabe hei mir dr’Abe miteme gmüetlech Brettspiu la usklinge (drum heisst üsi Brettspiu-Gruppe o „Brot und Spiele“). Ah, und d’Manu het öppe dr’bescht Härdöpfu-Salat gmacht wos je hets gits!
Für aui die wo itz glustig sy und o möchte tafle, häbet Geduld. Leider isch dr’Grill z’chli zum meh aus 3 kg SpareRibs z’mache u drum chöi mir euch nid aui glichzytig ilade. Aber dr’Summer isch no länge, da wird sech ja sicher öppis ergä.
-
I ha mi Geburtstag sehr gnosse u möcht mi nomau bedanke bi wuch aune wo irgend ire Art a mi denkt hei hüt.
-
Nachdem i vor wenige Tage spontan ha Luscht uf Fondue übercho, hei mir diese Samschti Schertis zum Fondue iglade. We scho die ganz Hütte nach Chäs schmöckt, de chöi o grad 4 um ds’Caquelon hocke.
-
Syufester! Üsi Spiu-Gruppe het sech zu feinem Raclette troffe zum gmeinsam i ds’neue Jahr z’rütsche. Während em Fürwerch sy mir de (so rein us blöd) mitem Laser-Schwert im Garte am umefuchtle gsy 😀
-
Dr’John u sini Partnerin Sandra sy üs no grad im abtrende Jahr cho bsueche. Mir hei guet zäme taflet, dorfet u o es Müh gügelet.
-
Mir sy mit dr’Familie Moor uf Heimeschwand ueche ga brunche u hei so schöns Wetter bi super Ussicht chönne gniesse. Glichzytig heino grad Gotte u Götti, sowie Gotte- u Götti-Meitschi chönne ihrer Gschenk übergä.
-
Obwou bereits Dezember isch, hei mir dr’Grill fürepackt und säuber Burger gmacht mit Haguhans-Burger vom Metzg (die sy ca 150 g pro Fleisch). Het richtig geili Burger gä wo so dick sy worde dass Chiefer-Usrenk-Gfahr bestande het 🙂
-
(Gotte) Gabi, aues Liebe u Guete zum Geburtstag. Es het gfägt bi euch z’fyre und uf di azstosse.