-
Ds lange Plane vo Lükus Pouterabe het sech glohnt. Er gseht cheibe fesch us i syre Football-Usrüstig und er isch o üsserscht erfougrich bim Verchouf vo Züg zum sech sis Znacht z’verdiene. Bim Lasertag spiele sy mir de aber doch aui ordentlech i ds’Schwitze cho und hei chönne im Bitz umeballere wie die Hohle (o wenn nid aui glich guet treffe :))
-
Bi beschtem Wätter hei ds’Coni Oesch (itz nüm) u dr’Fli Carrera im schöne Schloss Spiez ghürate. Nomau härzlechi Gratulation euch beidne, gniesset’s und bliebet wie dir syt.
-
Nach fasch 3 Monet Pouse hani wieder mau es „A Game of Thrones“ Brettspiu gwünscht zum Spiele. Wie scho bim letschte Mau het’s mi sehr möge fessle, und bsungers we e sech grössere Kampf abzeichnet (oder mä vomne Gägner überrascht wird) stigt dr’Puls grad nomau meh 🙂
Diesmau hei mir e extra 4-Spieler Variante gspiut wo vorauem d’Siegbedingige chehrt und d’Spiuzyt sött verchürze (was üs überhoupt nid glunge isch). Im Basisspiu spiut mä bis öpper 7 Festige oder Burge unger sire Kontrolle het (oder maximau 10 Runde); hie het jede Spieler verschiedeni Ziel wo Pünkt gäbe we mä se cha erfülle (sie gäbe o nid…
-
Mir hei Bsuech übercho vo mire Gotte und ihrem Maa wo ds’Wuchenend am Interlakener Trucker festival sy gsy. Mir hei dr’ganz Namitag bi beschtem Wetter chönne dusehocke u quatsche.
I ha’s sehr gnosse, haut vorauem o wüu d’Distanz zwüsche de Wohnorte so gross isch, dass mä sech nume 2-3 mau gseht im Jahr.
-
Chum vom Camping zrügg, hei mir de o no grad e Brot und Spiele ;)-Abe gha. Diesmau sy vorauem Team-basierti Spiu gspiut worde (2-vs-2), wobi bim einte Spiu d’Teams ersch im Verlouf vom Spiu sy bekannt worde.
-
Das isch es richtig schöns Wuchenend gsy. Mir hei e sehr agnehmi Zyt mit guete Fründe, feinem Ässe und sogar chli Sunne (aber no nid brenntig) dörfe gniesse.
-
I mire Funktion aus Trouzüge bi ig mit Brütigam Lüku ga Hochzyts-Garderobe ussueche. Mir werde cheibe guet usgseh, sövu steit itz fescht 🙂
-
I ha mit mire Trouzüge-Kollegin abgmacht für es paar Vorbereitige und Abklärige. Derbi hei mir no chli Seich gmacht woni no nid witer cha druf iga; aber es het unheimlech Spass gmacht – i ha mi i däm Moment knapp 10 Jahr jünger gfüeuht.
-
Mir hei üs wieder mit üsere Spiu-Gruppe troffe und 3 verschiedeni Spiu chönne spiele, eis Spiu sogar 4 mau. I ha grad e recht guete Abe verwütscht u 2 mau dr’erscht Platz erreicht 🙂
Wenn ig aber so uf d’Statistike luege, de füehrt i üsere Gruppe ke Weg ar Manu verbi. Aus i auem bringt sie die konstantischte u beschte Resultat. Und i bi froh e Gegespielere z’ha wo mi immer wieder forderet und d’Messlatte vorgit.
-
I ha mi mit Reby u Lüku troffe zum gmeinsam es bitzeli z’Spiele, u Lüku het si chürzlech agfangni Louf uf 7 Siege am Stück chönne usboue.