U o dr’zwoit Heim-Match vom SCB hani im Stadion chönne luege, leider aber diesmau ke Sieg… Aber (Götti) Mike het’s sicher glich gnosse wieder mau amne Match z’sy :)
Chum nach sir jüngere Schwoscht het o (Götti) Mike sy Geburtstag u zure Burger-Party zu sine Ehre iglade. O dir, Mike, aues Guete a dim Geburtstag – la di la fyre, hesch dir’s verdient.
D’Sandra hets bsungers so lang im Usgang z’sy bis sie no ds’letschte Ching isch gsy. Sie chas haut äbe nid nume guet mit Ching sonder wicklet o (fremdi) Erwachsni ume Finger 🙂
Üsi gueti Fründin, ds’Reby, het zur Geburtstags-Fyr iglade, was mir üs natürlech nid hei la entga. Happy Birthday Reby, gniesses mitem älter werde solang no ds’2 am Rügge bliebt :)
Dr’John u d’Sandra, sini Partnerin, sy ufe Mittag zu üs cho zum gmeinsame Grille, chli Sy und Laffere. Mit so gmüetleche Sunntige laht sech d’Wuche guet la usklinge.
I ha mir hüt a üsem „Brot und Spiele ;)“ Abe es Spiu gwünscht woni vor 8 Monet mau ha übercho aber no nie gspiut: „El Grande“ (Spiel des Jahres 1996). Mir sy auso ohni Vorkenntnis i die Rundi und hei es packends und lustigs Spiu dörfe erlebe wo trotz em Auter vo 20 Jahr no immer verma z’packe u begeistere.
Am hütige Brot und Spiele Abe het sech e Gascht derzue gsellt, wo sech o bi beidne Spiu wacker gschlage het. Es macht haut äbe scho Freud we mä ds’Hobby so cha witergä und Angerne necher bringe.
Eigetlech hätte mir mit Moors id’Badi wöue, was mir weg miserablem Wetter aber hei müesse absäge. Mir hei drufabe haut eifach für speter abgmacht und so e gmüetlech Abe mit guete Gspräch, amne Gläsli Wy und mehrere Gläsli Grappa verbracht.
Hüt isch dr’gross Tag für Reby und Lüku gsy. Die Zwoi hei sech ds’Ja-Wort gä während dr’Stee und mir die verantwortigsvoui Ufgab zuegfaue isch Aues im Hingergrund z’organisiere und dene Zwoine e unvergässleche Tag z’schenke.
Zuesätzlech zu de „normale“ Trouzüge-Ufgabe hani o no e Darbietig zämegsteut zum so chli für Ungerhautig sorge und die Zwoi früsch Vermählte chli us dr’Reserve z’locke 🙂
I bi durchus nervös gsy während mire Darbietig u cha drum nid glich säge wie und ob sie bi de Lüt acho isch. Aber so was i ghört ha, muessi mi nid verstecke derwäge. Es schynt de Lüt gfaue z’ha und heig doch mehreri Lacher und Verblüffer erzügt.
Ufgrund vore mügleche Wiederverwändig zumne spätere Zytpunkt cha i hie nid witer uf Details iga 🙂