-
Lüku isch hüt 30gi worde u het e Überraschigs-Party übercho ungerem Motto „Superhelde“. D’Überraschig isch gloub guet glunge und mir hei aus verchleidete Huufe es fröhlechs Fescht gha.
-
Swiss Toy! Angers aus i vergangene Jahre het mi dr’Video Game Bereich öppe gar nüm interessiert, derfür hani mit Lüku es üs unbekannts Spiu chönne usprobiere, e Hampfele Impuls-Ichouf abwehre (uff, Glück gha :)) und es paar Würfle imne Warhammer Miniature-Match werfe.
-
D’Familie Moor het Ferie und het üs spontan iglade zumne abendleche Käfele mit Bier u guete Gespräch.
Und prompt a dem Abe het d’Sandra eifach nid wöue pfuuse und isch wach bliebe, und wach bliebe … und wach bliebe.
-
Nachere länge Fahrt vom Thurgou nach Bern im Rege ha i mi ufgmacht uf Thun zum mit Lüku u Fründe dr’Fulehung z’fyre.
I bi definitiv z’aut für Settigs… Oder vilech het ds’Uswärts Pfuuse und die astrengendi Hei-Reis ire Tribut gforderet. Ömu bis zum Schluss düremache hani schlicht nüm möge 🙁
-
Ufem wite Weg i Thurgou zu Manus Götti und Familie, hei mir no e Abstecher a Tag der offenen Tür vo Brösis Arbeitgäber gmacht.
Nach Jahre weissi itz nid nume theoretisch was Brösis Firma produziert, sondern cha mir das ändlech o konkret vorsteue und beschrybe 🙂
-
Und scho wieder e Geburtstag 🙂 Diesmau isch Mike (Sandras Götti) es Jahr äuter worde und het das miteme gmüetleche Grille mit Fründe gfyret. Happy Birthday (aute Sack :))
Es wird nid dr letscht Geburi bliebe i de nächschte paar Wuche 🙂
-
I bi ganz spontan iglade worde ds erschte SCB Heimspiu vor VIP-Tribüni us dörfe z’gniesse.
Wie sech het zeigt sy mir öppe die einzige Erwachsene gsy wo es SCB-Dress treit hei im VIP Bereich… Irgendwie es komisches Gfüeu…
-
Ds’Reby het Geburi gfyret und zum Fescht iglade. Mir wünsche nomau aues Guete u danke für de gmüetlech Abe wo mir hei chönne zäme verbringe.
-
Wow, mir hei üs z’sechste höch troffe und e ca 4-stündigs Kampf um Westeros und dr’Iserner Thron gha.
Mir hei Game of Thrones ds’Brettspiu gspiut und i ha bim Uslose usgrächnet die unsympathische Greyjoys verwütscht. Aber jä nu, i ha nes zeigt zu was d’Ise-Männer fähig sy. Was tot ist, kann niemals sterben.
-
I bi mitem John es Fyrabe-Bierli ga schnappe und ha ungerwegs no mi ehemalig Usbiudner us Lehrzyte troffe.