-
Endlech PlayOffs! Auerdings muess dr’SCB no chli i de PlayOff acho. Dr’erscht Match isch mehrheitlich no wie es normaus Saison-Spiu gsy. Aber das wird scho no, und d’Mutze hei no guet Luft zum Ufdräie und Rocke.
-
Und es isch offiziell, dr’SCB isch Qualisieger 2016/2017 (angers aus letscht Jahr :)) u itz duuret’s numeno e Wuche bis Play-Offs losgö. Hach, wie ig mi freue!
-
Obwou’s mi afänglech chli agschnäggelet het, hani mi ufgrafft und bi allei a SCB-Mätsch. Und i bi froh hani’s gmacht. Zwar hei d’Mutze ir Verlängerig verlore, aber längwielig isch mir nid gsy – sowou dr’Mätsch, aus o miner Sitznachbäre hei beschti Ungerhautig bote 🙂
-
Nach ere gfüute Ewigkeit hanis wiedermau gschafft e SCB-Mätsch im Tempu ga z’luege – mi erscht im 2017 notabene – u ha de o grad es freudigs Schou-Loufe miteme 8:1 dörfe erläbe. So macht das natürlech Freud.
-
Dr’Materiau-Fisu vo Sparta Prag isch ono krass ungerwegs. Dr’ganz Match lang nume churzärmlig ar Bande – u wie mer plötzlech gseh hei o nume i de churze Hose…
-
Vorem hütige Match isch no dr’Marco Bührer – sines Zeichens 15 Jahr Goalie bi Bern – verabschiedet u sini Nummere unger ds’Stadiondach zoge worde. Er söuber isch zwar recht cool bliebe, aber schüsch isches e emotionale Moment gsy.
-
Das isch hüt e wunderbar geile Match gsy gäge d’Luganesi. Obwou mit no zmitzt ir Saison sy het sech’s scho vei nach Play-Offs agfüeut – spannends Spiu, u viu Emotione uf und nebem Fäud.
-
D’Sandra isch zum erschte Mau live amene SCB-Match derbi gsy und het sehr möge rüehme wie toll dass es sig und wie guet es ihre het gfaue.
Mir hei üs extra es Spiu vor Champions Hockey League usgsuecht wüu die erfahrigsgemäss weniger Zueschouer hei. Auerdings sy mir de glich scho nachem erschte Drittu wieder hei wüu’s sehr chaut isch gsy und d’Sandra de doch het afa unruiger werde.
-
Nachdem mir bereits über ne ganzi Saison Bsitzer vo 2 Sitzplätz im Berner Hockey-Tempu sy, het’s d’Manu endlech o mau gschafft live im Stadio derbi z’sy – sie het de no grad e wunderbare 5:0 dörfe gniesse.
-
Und itz het d’Hockey-Saison o für mi offizieu agfange mitem Champions Hockey League Spiu SCB gege Black Wings Linz, wo üse SCB miteme souveräne 5:0 für sich het chönne entscheide.
I ha mau wieder Gfeugha u grad denn wöue es Foto füre Blog mache wo’s plötzlech es Gou git 🙂