-
Üsi (nüm so) chlini Bohne isch nach 3-tägige Ferie bi Grosi u Grösi itz wieder daheime u würkt aus wär sie grad viu äuter aus no am Sunnti.
Obwou’s nid lang isch gsy, hei mir se doch scho sehr vermisst, üs aber o gfreut dass sie au es Strahle im Gsicht umetrage.
-
D’Sandra het mir tatchräftig ghoufe bim zämeschrüble vom neue Bett wo mir üs zueche ta hei. Sie het chönne häbe, Schrubezieher und Schrübli hole u bringe, und ab und zue schmüselig cho beobachte was ig itz grad mache.
-
Nachdem mir fertig igchouft hei, hei mir völlig unerwartet no grad mi Cousin Dänu u si Sohn troffe in Thun. Wie sech usegsteut het sy o sie uf Gschenkli-Tour gsy 🙂
-
Dür gschickts Irreleite hanis gschafft mit dr’Sandra ga Manus Geburi-Gschenk choufe ohni dass die chlini Zwetschge aues usplapperet daheime 🙂
-
Nachdem ds’Schöppele vor wenige Tage so guet klappet het, hani hüt Abe problemlos chönne Hüeti-Dienst übernä während d’Manu i Rückbiudigs-Kurs gange isch.
-
Mir sy vo Grosi u Grösi uf Schenke iglade worde alässlech Brösis Geburtstag u hei aui zäme es leckers Raclette gässe (ds’4. innert 16 Tag).
-
Mir hei die Tage immer mau wider e Spatziergang gmacht bi däm schöne Wätter. D‘ Sandra het aube e riise Spass gha, wesi mitem Päpu het chönne Steine id Zulg wärfe.
-
Syufester! Üsi Spiu-Gruppe het sech zu feinem Raclette troffe zum gmeinsam i ds’neue Jahr z’rütsche. Während em Fürwerch sy mir de (so rein us blöd) mitem Laser-Schwert im Garte am umefuchtle gsy 😀
-
Dr’John u sini Partnerin Sandra sy üs no grad im abtrende Jahr cho bsueche. Mir hei guet zäme taflet, dorfet u o es Müh gügelet.
-
Hüt hei mer e Familieusflug zum Chinderarzt gmacht, wöu beidi Töchtere id Kontroue hei müesse. D‘ Sandra isch mittlerwile jetz o scho 13,6 kg und 92,5 cm gross. U bir Laura hei mer 58 cm und 5kg 90 gramm gmässe.