-
Nachdem i geschter ir Romandie bi ga ds’ersteigerete Chinderbett abhole, hani hüt aues chönne zämesetze u dr’Sandra so e riesigi Freud mache.
Während em Zueluege het sie sich immer wieder bedankt und het’s chum möge erwarte bis ändlech aues isch zäme boue gsy und sie het chönne ufechlättere.
-
Mir hei es Bsüechli bir Familie Eggima gmacht damit mir üsem Göttibueb Urs chöi dr’säuber gmacht Adventskalender verbi bringe. Es isch grad i dene Momente immer wieder schön z’gseh wie guet Cousin und Cousine mit dr’Sandra chöi – sowou spiele, aber o chli uf se ufpasse.
-
I ha es chlises Video gmacht wo zeigt wie d’Sandra versuecht ihrer chline Schwöster Socke a’zlege. Sie het nume mässig Erfoug…
-
D’Manu het sech die letschte Täg i ds’Züg gleit zum dr’Sandra e eigete Adventskalender z’bastle.
-
D’Sandra unterstützt mi, wosi nume cha mitem Bebe… Neuerdings düe mer o solidarisch Stille (es isch zwar chly müehsam, dass sie d’Hose jedes mau grad abzieht..).
-
Woni mit de Ching hüt im Chäuer bi gsy, isch mer d’Spieuzüg Röhre us der IKEA id Finger gheit, womer voreme Zytli für d Sandra gkouft hei, sie aber no nüt drvo het wöue wüsse. D’Sandra het dä Nami när zimlech ihre Spass gha dermit 🙂
-
I bi mit dr’Bohne ga ichoufe und bi bir Kasse agsproche worde und ha Lob erhaute: „Schön, mau wieder e normale Name zghöre für nes Ching, u nid so Öppis moderns wo niemer weiss wie schrybe“. Made my day 🙂
No es paar chlini Infos zu dere Person: er isch männlech gsy, knapp jünger aus ig und schynbar o am plane für Familie über-nächscht Jahr.
-
Chinder-Wysheite: „We sie wach isch, wecke mir se“ 🙂
-
Angers aus bir Sandra het sech Lauras Buchnabu-Zipferl lang gwehrt, bis er hüt endlech abgheit isch. Itz luege mir, dass o d’Laura e schöne Buchnabu überchunnt wie ne d’Sandra het.
-
Syt wenige Tag tuet d’Sandra itze o Stimme imitiere und faht so o afa rede für ihri Stofftierli 🙂 Und glich wie bir Manu u mir wird o ihri Stimm höcher we sie emne Bäbi/Tierli e Stimm verleiht.