-
Hie no 2 Videos vo üsne Camping-Ferie wo zeige wie viu Spass d’Bohne im Gumpi-Schloss het gha.
-
Mir sy dieses Wuchenend i ds’Stammertal uf Familie-Bsuech u hei e sehr agnähmi Zyt dörfe bi mire Gotte u Familie verbringe. Und d’Sandra und ihri Ur-Oma hei ume eis Glägeheit gha e chli Zyt zäme z’verbringe.
-
Hüt het üs d’Sandra grad 2 mau überrascht. Zum einte het sie vo de Cousin sofort erfougrich abgluegt wie mä uf ds’Schouku-Ross stigt und wieder drab chunnt. Aber no überraschender isch gsy wo sie üs ihri Adresse verzeut het ohni das mir öppis hei vorgchüschelet.
-
Chum isch Herbst-Afang hei mir üs es Fondue gnemiget 🙂 Angers aus bim letschte Mau het sech d’Bohne aber nid glich derfür la begeistere. Jänu, das chunnt de sicher no.
-
Chum nach sir jüngere Schwoscht het o (Götti) Mike sy Geburtstag u zure Burger-Party zu sine Ehre iglade. O dir, Mike, aues Guete a dim Geburtstag – la di la fyre, hesch dir’s verdient.
D’Sandra hets bsungers so lang im Usgang z’sy bis sie no ds’letschte Ching isch gsy. Sie chas haut äbe nid nume guet mit Ching sonder wicklet o (fremdi) Erwachsni ume Finger 🙂
-
Mie hei ume eis e Bsuech bim Frouarzt gmacht u hei e Blick uf Pfupf gworfe. Sie entwicklet sech sehr guet was üs sehr freut. Ah, d’Sandra het bim Ultraschaue dörfe häufe und em Doktor de gar 2-3 mau zviu ufem Computer umedrückt 🙂
-
Mir sy in Excenevex zure Wuche Glamping (Glamour Camping) acho und hei üses vorinstallierte Wohnmobil chönne i Bezug nä. Das wird sicher e gmüetlechi Wuche.
-
Ds Schueujahr het agfange und dementsprächend o s MuKi-Turne. D’Sandra und ig sy jetz für dises Jahr offizieu agmäudet. Di drü Mönet warte hei grad vieu bracht. Sie het fasch die ganz Stung möge mitspiele und mitseckle. S Thema hüt isch gsy: Mir gö (imaginär) id Badi – ä chlyni Staffete im Sinn vo „i packe mini Badtäsche“ u när hets no e chlyne Poschtelouf gäh, wome mit Matte, Bänkli, Barre etc Wasserrutschine und Sprungbrätt u was mä haut so cha mache ir Badi nachegsteut het. D’Sandra het ei riise Fröid gha (u es het äuä bim umeseckle keni so gschwitzt wie ig).
-
I ha der Sandra vor ere Wuche e Badeponcho bsteut, da s Badmänteli wosi vo Götti Mike het, langsam chly chlii isch worde. Mir heine ömu grad sofort müesse aprobiere 😉
-
Recht spontan hei mir üs entschiede bi däm soso-lala Wetter e Bsuech im Tierpark Dählhölzli z’mache – o chli ir Hoffnig es syg de nid gstungget vou. D’Sandra het viu Tier chönne bestuune u het o no daheime viu vo de gsehne Tier i ihrne Büechli nomau füre gsuecht.