-
D’Laura het ds’nächscht grössere Bett übercho u het sech vo Afang a wohl gfüehlt dinne. D’Sandra het mir iifrig ghoufe bim zämeboue u de o grad aui wichtige Spiusache für d’Laura verbi bracht 🙂
-
Mir hei das schöne Wätter gnosse u sy ufe Spiuplatz üs chli ga ustobe.
-
Bim Daft Punk lose (und ir Wohnig umejoggle) isch doch d’Laura tatsächlech uf mim Arm ipfuuset. Sie het derbi haut ds’nächscht Beschte aus Nuggi-Ersatz verwendet 😀
-
I bi i Gnuss cho und ha live im Tempu dörfe derbi sy wo üser Mutze d’ZSC Lions i die verfrüehte (us ihrer Sicht) Summerferie gschickt hei.
Füre PlayOff Haubfinau passt gloub ds’Motto vo Tourismus Davos o no ganz guet: „Auf und Davos!“ 🙂
-
Was isch de nume mit dene Berner und Zürcher los?!? Sehr zu mire Freud gwinne d’Mutze o ds’dritte Spiu u sy churz dervor dr’Quali-Sieger ZSC früehzytig i d’Summerpouse z’schicke.
-
Hüt isch d’Houptprob vom Heimberger Turnverein gsy und so sy o Sandra u Manu mit dr’MuKi-Turne-Gruppe ga üebe. Laura u ig hei se grad begleitet wüu mir hei wöue luege was die da mache.
I ha es erschts Video gmacht, muesses aber no sichte. Eventuell muessi no es Zwoits mache während dr’Uffüehrig säuber – die isch am Samschti, 12. März.
-
D’Laura cha ja cheibe gwungerig luege was dr’Päpu da am Handy macht – ganz sini Tochter we’s um Technik geit 🙂
-
I bi i ds’Vergnüege cho und ha wieder mau e 5-Spieler Partie vom Brettspiu „Game of Thrones“ chönne spiele. D’Mitspieler hei o die passende Attitude mitbracht und so hei mir üs verbündet u betroge, hei verhandlet, bedroht und generell Ränke gschmiedet.
-
I ha scho sehr lang ke Telefonzeue meh gseh (oder ömu wahrgno), drum bini hie fasch chli i Nostalgie verfaue.
Wie’s usgseht gits TaxCards immer no 🙂
-
Vor es paar Tag hani aui Brettspiu usgstoubet und uf Ricardo gsteut. Hüt hei d’Auktion geendet u i bi überrascht wieviu druf bote worde isch 🙂