-
Mir hei e neui Art gfunge wie mir mit dr’Sandra chöi ga Ichoufe ohni irgendwie es Theater z’ha… Mir gö itz mitem grosse Leiterwägeli; so isch o grad dr’Transport hei eifacher.
-
Eigetlech hätte mir mit Moors id’Badi wöue, was mir weg miserablem Wetter aber hei müesse absäge. Mir hei drufabe haut eifach für speter abgmacht und so e gmüetlech Abe mit guete Gspräch, amne Gläsli Wy und mehrere Gläsli Grappa verbracht.
-
Einisch meh verblüfft üs d’Sandra mit ihrer Art. Hüt het sie üs plötzlech zeigt, dass o sie Nuschi am Bode nume mit de Füess cha uflese… U vorauem zueverlässig u Glichgwichts-sicher!
Mir hei de grad es chlises Spieli drus gmacht und d’Nuschi vo Fuess zu Fuess witergä ohni dass es abegheit. Wie sech usegsteut het, het d’Manu mit dem Trick fasch am meischte Müeh, was aber mitem schwangere Buch o guet erklärbar isch.
-
Inspiriert dür Rebys Wahl vor Musig füre Gang vore Altar, hani unbedingt wieder einisch müesse STAR WARS luege. Die Trilogie wird eifach nie alt 🙂
-
Hüt isch dr’gross Tag für Reby und Lüku gsy. Die Zwoi hei sech ds’Ja-Wort gä während dr’Stee und mir die verantwortigsvoui Ufgab zuegfaue isch Aues im Hingergrund z’organisiere und dene Zwoine e unvergässleche Tag z’schenke.
Zuesätzlech zu de „normale“ Trouzüge-Ufgabe hani o no e Darbietig zämegsteut zum so chli für Ungerhautig sorge und die Zwoi früsch Vermählte chli us dr’Reserve z’locke 🙂 I bi durchus nervös gsy während mire Darbietig u cha drum nid glich säge wie und ob sie bi de Lüt acho isch. Aber so was i ghört ha,…
-
Oh ja. Dr’Pouterabe isch e voue Erfoug gsy. Nachere üppige Mahlzyt im Tramdepot ds’Bern, sy mir schlussendlech bis zur Polizeistung im Usgang gsy und so ersch uf die 5i am Morge wieder daheime itrudlet. Trotz meh Schlaf aus erwartet gspüre mir aui ds’Alter nach sore durchzechte Nacht 🙂
-
Ds lange Plane vo Lükus Pouterabe het sech glohnt. Er gseht cheibe fesch us i syre Football-Usrüstig und er isch o üsserscht erfougrich bim Verchouf vo Züg zum sech sis Znacht z’verdiene. Bim Lasertag spiele sy mir de aber doch aui ordentlech i ds’Schwitze cho und hei chönne im Bitz umeballere wie die Hohle (o wenn nid aui glich guet treffe :))
-
Was für e wunderbar heisse Tag! I bi zur Abchüelig i Sandras Pool ghocket während sie e riese Freud het gha em Päpu Wasser a z’sprütze.
-
Bi beschtem Wätter hei ds’Coni Oesch (itz nüm) u dr’Fli Carrera im schöne Schloss Spiez ghürate. Nomau härzlechi Gratulation euch beidne, gniesset’s und bliebet wie dir syt.
-
D’Sandra macht im Moment grad churz Ferie bim Grosi und so hei d’Manu und ig i dene hektische Zyte es paar Momente für üs zum quatsche und üs ustusche. Das tuet äbe scho guet.
So sy mir bispiuswys o i Badi eifach nume zum chli da liege und Sunne gniesse, ohne das mä geng muess luege und dr’chline Usrissere nachejufle 🙂