-
Playoffs!!! Die wichtigsti Zyt im Hockey geit los … u i ha mit Fründe zum Znacht u Spiu-Abe abgmacht 🙂
-
Eigetlech hei mir mit John u Sandra (sire Fründin) nume abgmacht zum Eis ga z’zieh. Vor luter Quatsche isches so spät worde, dass mir no grad es gmeinsams Znacht aghänkt hei.
-
D’Resultat vom Brettspiu Math-Trade sy itz bekannt und bestätiget worde. Mir werde wieder 3 Spiu los wo mir nüm würklech gspiut hei u überchöme derfür 3 angeri, für üs neui Spiu. Mau luege wie üs die gfaue — faus nid, wandere sie früecher oder speter de o wieder ine Trade 🙂
-
Mis Mami het ihres Pensions-Apero gfyret wo mir natürlech o verbi sy und gratuliert hei. Was sie itz gschafft het, brucht bi üs sicher no 30 Jahr u meh 🙁
-
Recht spontan sy hüt Sterrys zumene usgiebige Käfele bi üs verbi cho. D’Sandra het sech riesig gfreut wo sie ihri Gotte ufem Parkplatz entdeckt het u het so luut „Tee“ grüeft, dasses sogar d’Ste dusse ghört het.
-
Manu u ig hei e säuber usdenkti Mini-Variante für ds’Brettspiu „Thunderstone“ usprobiert und sy beidi sehr z’friede mitem Ergebnis.
D’Manu isch gloub vorauem so z’friede wüu dr’Würfu sehr zu ihrne Gunste gheit isch; u mir gfauts wüu dr’Würfu es eher „trochnigs-rechnerischs“ Spiu-Element mitere Priise Zuefau chli unberechebarer macht u so i dene Momente no zuesätzlechi Spannig erzügt.
-
Nach 43 Jahr gits im Schwizer Hockey ume e Cup-Sieger. U dä heisst SCB! D’Mutze hei’s gschafft vor Heimpublikum dr’Pokau z’gwinne.
-
D’Ste, mi Schwoscht, het zu ihrem letschte Geburtstag miteme 2 am Rügge iglade. Es isch es gmüetlechs zäme-sy mit guete Lüt u feinem Esse (u Desserts) gsy. Happy Birthday, Ste!
-
D’Sandra isch fang recht es Lusmeitschi – hüt het sie mehrmaus nachdem sie gfürzlet het uf mi zeigt u derzue „Päpu!“ grüeft. Sowit sy mir auso scho… 😀
-
Vor wenige Tage hani Mac Mini bsteut und itz Stück für Stück es Mediacenter druf organisiert. Es git zwar no etlechs z’mache dranne, aber es funktioniert doch scho so guet, dass mes cha bruuche wie plannet.