-
Und es isch offiziell, dr’SCB isch Qualisieger 2016/2017 (angers aus letscht Jahr :)) u itz duuret’s numeno e Wuche bis Play-Offs losgö. Hach, wie ig mi freue!
-
I ha hüt z’erschte Mau chönne derbi sy we d’Laura komplett alleini louft – sie isch uf mi zuegloffe, guet e Meter, u het sech när i miner Scheiche la gheie.
-
Mir sy hüt Nami bi mine Eutere verbii (Bommi und Ätti) u hei mit ihne das wunderbare Wätter bimne Waldspatziergang gnosse. D’Sandra het dörfe s Velöli mitnäh u het o der Plousch gha. Zum z’Nacht hei mer no gmeinsam es feins Raclette g’ässe.
-
Herrlech! Das wunderbare Wätter het o üs wieder useglockt. Mir heis gnosse wie verruckt u zum zNacht het Pädu ume eis der Grill aglaa 🙂
-
I ha dieser Tage es luschtigs Comedy „Werbe“-Video gfunge wo sech a Trump richtet und ihm vorschlat nach „America First“ söu er doch „Switzerland Second“ e Chance gä.
-
I ha hüt erfahre, dass i mi o dieses Jahr wieder über ne schöne Bonus darf freue. U das trotz afänglech nid so rosige Prognose (mir hei no grad 2-3 grossi Projekt i ds’neue Jahr überegno).
-
Eis vo de chürzlech ertuuschte Spiu hei mir scho, drum ha ig’s direkt ane Kolleg, wo relativ neu im Hobby isch, la schicke. Er hets mau amne Spiu-Abe bi üs gspiut und es het ihm sehr gfaue, und itz isch er miteme eigete Exemplar überrascht worde 🙂
Es handlet sech bi däm Spiu um Evolution, es Charte-Spiu wo mä mit verschiedene Eigeschafts-Charte (zB Klettern, Fleischfresser, Hörner etc) Dinosaurier erfingt und die när i Überlebenskampf mit de Dinos vo de angere Spieler lat la trete.
-
I ha e bsungers länge Mittag gmacht und bi a ds Grab vo mim Grosi u drufabe no bim Götti verbi ufenes Schnaps. Nachdem i letscht Jahr nach langem z’erschte Mau am Grab bi gsy und es mi recht het mitgno, isches mir dieses mau ringer gange.
Liebs Grosi, i vermisse Di.
-
Bim aktuelle Brettspiu MathTrade chöi mir es paar Spiu loswerde wo mir sowieso nüm gspiut hei u im Gegezug es paar ertuusche wo mir no nid kenne. Itz sy mer gspannt wie guet de die neue Spiu üs gfaue.
-
I ha doch tatsächlech bim hiesige Flohmärit im Juni mau ä Stand ergatteret. Bis jetz hani immer d Flyer irgendwo gseh hange u denn sy aube scho aui Plätz vergäh gsy. Bi ja de gspannt, wie mir üs aus Verchoufstalänt gäbe und wi üsi Ware wäg gö…