Itz wo Tage wieder wärmer wärde u mir meh und meh dusse hocke, hei mir üsser Chüssi usenang gno und neu igfärbt. Zwar es müh müehsam, so het sech’s doch sehr glohnt.
I ha hüt dr’erscht Prototype vo mim eigete Brettspiu fertig bastlet – er gseht o entsprechend schäbig us :). I dä nächschte Tage wirdeni mau d’Manu müesse überrede zure Proberundi, und hoffe, dass es einigermasse funktioniert…
Und o ds’zwoite Finau-Spiu hei d’Mutze für sich chönne entscheide. Dr’EV Zug muess sech ächt öppis überlege, schüsch wird das ä churzi Serie bis zum Pokau.
Wow, was für ne Uftakt i Playoff-Finau. Üser Mutze hei dr’EV Zug i de erschte 30 Minute richtiggehend vom Iis putzt. Die zwoiti Matchhäufti hei sie 2-3 Gäng usegno, aber es isch glich bim 5:0 bliebe.
FINALE! Imne ungloubläch länge Spiu (2 Verlängerige und Penauty-Schiesse) heis d’Mutze wie scho im Vorjahr gschafft und stöh im Finau.
I de nächste Tage wird de uscho wär zwüsche üs und em Pokau steit 🙂
Obwou dr’SCB das Spiu gäge Biel isch zwar verlore gange, aber was d’Stimmig im Stadion ageit hani gloub no nie e derart geile Match erlebt. Im letschte Drittu (Bern isch mit 5:1 hinger gsy) het d’Stehrampa mau richtig afa aheize und mit dr’Euphorie o aui ufe de Sitzplätz möge mitrisse. Botz geit das ab we 16’000 Fans ihres Team afüre!
Endlech PlayOffs! Auerdings muess dr’SCB no chli i de PlayOff acho. Dr’erscht Match isch mehrheitlich no wie es normaus Saison-Spiu gsy. Aber das wird scho no, und d’Mutze hei no guet Luft zum Ufdräie und Rocke.
Mir sy hüt ad AgriMesse in Thun, vorauem o zum dr’Ätti ga z’bsueche wo mitem Verein Freunde alter Landmaschinen e Stand ufgsteut het gha — inklusive ere Live-Demonstration wie auti Traktore (i däm Fau e Landini vo 1955) hei müesse gstartet wärde.
Und da ig ihm bir Modernisierig vom Stand ha ghoufe, hei mir itz natürlech o wöue gseh wie dasses itz aues so usgseht und uf d’Bsuecher würkt.