-
Mir isches per Zuefau glunge öpperem e grossi Freud z’mache. I cha eifach im Moment no grad nid z’viu säge derzue.
-
Itz isch mir grad ufgfaue, dass es dä Blog zwüschezytlich uf 100 Artikle u meh gschafft het.
Kommentär hets hingege nume 4 gä (und no 1 Trackback). Auso nume nid so schüchele, dir Läser, weder d’Manu no i bisse, dir dörft auso gärn öppis schrybe =)
-
Mir hei Gabi u Mike Moor es Dankeschön verbi bracht für ihri Iladig zum Tatarehuet-Ässe; u i gloube mir hei i ds’Schwarze troffe, was üs sehr freut.
-
Dr’Günter Struchen het am Chrischtchindlimärit in Steffisburg us sim Buech vorglese. Mir hei viu glachet ab de Brief-Wechsle vom Günter u sine „Opfer“.
-
I bi dr’Audi (A4 Avant Quattro 3.2 FSI) ga aluege u ha ne nach dr’Probefahrt o gchouft. Viele Dank a Mischu wo mi aus Expert het berate.
Dr’Mischu het dr’Bolide bir Testfahrt nid gschonet u i bi häu uf begeisteret was da a Chraft vorhande isch =) Ke Verglich zum Micra…
-
D’Manu het afa Gutzele u ig ha nach Möglechkeite derbi ghoufe (vorauem bi de Vanillekipferl).
-
Mir hei „Forrest Gump“ gluegt – dr für mi mit Abstand emotionaust u schönst Fium wo je isch dreiht worde.
D’Figur vom trottelige, aber so sympathische Forrest mit sire ewige, wenn o unerwiderete Liebi zerrisst mi aube fasch… U so fliesse meh aus nume es paar Träne.
-
D’Manu u ig hei spontan e Bsuech bi Monika und Ueli gmacht. Sie hei sech gfreut üs z’gseh u so hei mer e gmüetleche Abe zäme verbracht u chli über dieses u eis plouderet.
-
Mir si in Thun gsi u hei bereits viu vo de Gschenk zum Wichtele chönne bsorge.
-
Ds’Abo vo PlayStation Plus het sech scho glohnt. Itz biete sie ds’Game „Batman: Arkham City“ gratis a. U jede Monet ändere si d’Sortiment damit i no meh z’zocke ha =)